依家9點18分,咁早打到稿係因為稍後要落灣仔一趟,所以今朝早索性Home office,免得一來一回浪費時間。
由於呢兩日個市實在太悶,悶到要向個股埋手,於是早兩日就睇中咗隻滙控(00005),噚日仲決定揀隻Put(29344)落場。去到噚日嘅[下半Part]時,隻(29344)都仲未可以甩到手;但去到臨完場時10分鐘,見到滙控5分鐘圖嘅SlowSTC(14,3)落到超賣水平,見到(29344)證價比之前計嘅平均買入價$0.091低兩格到,但好奇怪,反而喺噚日下畫2點半時滙控5分鐘圖嘅SlowSTC(14,3)都未落到超賣位,但隻(29344)當時證價就同平均買入價打和,甚至多一格。
本來噚日讀者Walter都問呢隻嘢過唔過夜,老老實實一開始都過夜嘅心理準備,所以注碼比較細,但見到呢啲位咁奇怪,確實無乜信心再揸過夜;再加上我自已向來對揸輪證過夜呢件事都係麻麻地,都係索性收工算數,唔係唔想博,而係唔值得再博。
啱啱開咗市兩分鐘,我家老爺都出咗去返工,恒指開市升唔夠100點,到依家好快就見高開低收,喺9點33時報26632點,跌65點。再睇多次滙控,依家都算叫做跟市升,報$61.5,升0.5%,日線圖上已經升穿100天線($61.325),且下方條10天線($60.0)氣勢磅礡咁飆升,仲作勢想同條100天線相交,做出「黃金交叉」;唔係話無可能嘅,但就真係睇返條SlowSTC(14,3),%K線同%D線都上到9X呢啲位,唔博你跌都唔想再炒升。
開咗市10分鐘,恒指高開低收格局未變,依家日線圖上見恒指回落返去10天線(26627點)水平,SlowSTC(14,3)仍呈弱勢,一旦10天線無力承托,恒指繼續下行的話,又一個「頂」部出現,再拉遠少少睇,將最近幾個「頂」連埋一齊就得到呢條「下降軌」,如果確認的話,咁呢一刻就只係恒指啱啱完成一個「頂回落」。
承如頭先所講,稍後要過灣仔一趟,再返到公司恐怕都已經下晝3點打後嘅事,抱歉【輪證下半Part】今日臨時要暫停一日(Email、FB會照覆)。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:gladyshan@gmail.com;FB:輪證贏家