如果第一轉入友邦牛(58947)嘅話,咁應該一早收咗工;但噚日下晝先嚟入嘅話都真係要等到尾市友邦5分鐘圖SlowSTC(14,3)落到去嚴重超賣水平,先可以將隻(58947)落場,當時(58947)高低位做過$0.04/$0.042,平均買入價就係$0.041。至於另一隻恒指牛(59105)同友邦一樣,搵位落場都係要等到收市咁滯,最後嗰5分鐘(59105)高低位做過$0.052/$0.049,平均買入價就係$0.0505。
今朝早恒指開市只係微升37點,開報28812點,不過開市後恒指暫時(截至10點10分前)最高做過28869點,同上方第一梯隊嘅熊證29000至29099點嘅距離又再近咗少少。當以為呢堆接近2000張期指街貨會凍過水之際個市又沉返落去,anyway,就算下方最貼價嘅牛證有1235張期指,但以現價(10點19分計)28875點,仍然係上行嘅著數多於下行,(59105)仍然可以守住;至於(58947),隨住大市依家(10點20分)升逾100點,友邦股價都已經止跌,(58947)證價做緊$0.044,都叫做為得番個手續費先。
打緊稿時,我位師妹Coby突然WhatsApp我同我講佢今日AL,話「毒自去海洋公園」,一個人去海水公園最大路嘅原因就係今日生日,所以免費入場啫。可愛嘅師妹,生日快樂啦,希望你出年唔係單支,係孖住同人去海水公園啦。
依家10點24分,恒指似乎發力向上,依家報28918點,率先升穿20天線(28898點),保歷加通道計叫做爬返上去保歷加上升通道,日線圖上見SlowSTC(14,3)%K線低位升穿%D線,DMI嘅+DI亦同-DI差距收窄,劍指29000點咁款,(58947)同(59105)分分鐘下晝開餐。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#