噚日個市都真係幾玩嘢,升吓跌吓咁,都唔知想點;不過始終都係見到下方嘅牛證多好多,且上方嘅熊證又遠,所以就繼續出動隻恒指熊(59117),但就講到明要等分鐘圖出現超買先至好落場。最後就等到下晝2點50分至3點35分,恒指SlowSTC(14,3)上到超買水平,呢個時候(59117)就可以落場,按呢段時間(59117)做過嘅高低位$0.115/$0.107,拉個平均數$0.111作為買入價計,今朝開市後恒指裂口跌過百點,(59117)證價喺9點40分時高低位做過$0.122/$0.115,唔駛拉平均數,就算係$0.115走,都叫做有四格落袋。
依家10點33分,恒指由今朝跌轉升,仲愈升愈有,依家升137點,做緊25201點。開牛熊證街貨圖睇,上方25600至25699點為最貼價嘅熊證,而呢度就有相當於592張期指;上方熊證都開始有過千張街貨喺度,就係第四層嘅25900至25999點,同埋26000至26099點,分別有1378同1010張期指守住。
至於下方牛證最貼價就係24800至24899點,而呢度就有1236張期指;再落24700至24799點,呢度就有976點。咁樣比較之下,係咪覺得下方嘅重貨又近又多呢。
留意返,兩邊最貼價嘅範圍拉個中間位就即係25200至25299點,而依家10點43分,恒指再上多啲至25290點,依家就正正企喺牛熊街貨嘅中間位。開埋恒指日線圖睇,噚日見「十字星」觸保歷加通道底,今日就陽燭(都幾大支架)就由個保歷加通底反彈上去,噚日同今日兩日低位分別係24896點同24924點,兩者相差28點都可以算叫做「平底」嘅,追上追落似乎未喺時候,再睇吓個市之後點走先啦。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:gladyshan@gmail.com;Weibo[下半part]:#Gladyshan#