仲有一個星期就到普天同慶兼齊齊消費嘅聖誕節啦(仲要喺我老爸生日,佢真係12月25日生日架),聖誕到之前仲有一餐冬至飯要食;過完個聖誕同新年,一個月鬆啲就到農曆新年(咁就到要同我老媽賀壽,事關佢係2月頭生日架),所以每一年嘅聖誕同新年,我嘅「出血量」相信會比人哋多,不過大時大節洗嘅係開心錢嚟嘅,唯有寄望吓個市,睇吓可唔可以幫補吓啦。
依家9點48分,恒指微升5點,做緊26100點,靜到呢...開埋牛熊證街貨圖睇,唉,上方熊證第一梯隊26200至26299點,呢度有7張期指(真係7張,我都差啲唔係幾好意思講出嚟),至於下方最貼價嘅牛證就係26000至26099點,呢度有相當於518張期指,比起上方嘅好好多,唔食得都睇嘛。而比吸引睛嘅就係25500至25599點同25400至25499點,呢兩個位分別有1130同880張期指,同現價爭成500幾點我明係有啲距離,如果個市真係行得出呢個點數嘅話,沿途計埋計埋都有唔少期指執到。
用同一個點數比個市向上行又點呢?一上就上到26600至26699方呢度有974張期指,都係重貨區,但計落就真係比下行嘅食得少喎,至少最貼價嗰part講緊7 VS 518先啦。
「咁咪再睇返恒指日線圖> 跟住個搵隻靚輪> 再搵個靚位落場咪得囉。」都係嘅,不過我今日反而係開咗恒指波幅指數(VHSI)先喎,事關頭先計落上/下行點都要有500點以上嘅波幅先可以殺到重貨區嘛,咁就梗係望望條VHSI彈唔彈得起啦。依家10點5分先到VHSI做緊22.01,確實唔算係一個低位,你只可以話佢係處於一個偏低水平,事關14RSI做緊44.59,而SlowSTC(14,3)%K線(35.326)同%D線(37.339) 未到底。用保歷加通道量度嘅話,現水平處於保歷加下降通道中間位;但轉用天線嘅話,就剛好被條100天線(21.828)托住,雖則SlowSTC(14,3)未到底,但乃念%K線下行之勢收油且可能喺呢個位置升穿%D線,求其當你一彈就補返上星期三(12日)個下跌裂口頂22.57,個波幅點都唔會細得過依家(10點11分)嗰161點掛?!
依家10點12分,恒指升轉跌66點,大市做緊26028點,睇嚟26000點分分鐘上半都會無埋,恒指熊(69755),收回價26798點,同現價有逾700點差距且高過上方熊證重貨區,萬一咁唔好彩個市向上打嗰part咁遠嘅重貨區而你都唔走嘅話,我都幫你唔到 。小注吼5分鐘見超買先好落場,無位落就唔好勉強,始終今個星期同啲劇集嘅結局篇一樣,準備埋尾啦;唔落場亦無傷大雅。
電郵:[email protected];Weibo(下半part):#Gladyshan#