依家10點4分，返到嚟公司就見到個位一袋二袋淘寶；開埋個email收到原來八樓reception小姐send咗兩次email嚟叫我拎嘢，原來係輪商朋友Dick寄過嚟嘅月曆，連同之前另一間輪商朋友Daniel同Gary寄過嚟嘅，我想講你哋包辦咗我哋各人出年嘅月啦，多謝！
上個星期五(12月7日)講到恒指技術指由保歷加上升通道轉去下降通道，同時下方技術指標全數發出看淡號，想博多日恒指下行嘅就吼個靚位入隻貼價熊，埋單計全日恒指只係跌咗93點，嗯...day trade確係無肉食。
有無人揸貨揸到今日？有就真係恭喜晒你啦，事關依家10點13分恒指進一步下跌至256XX點，跌近400點嚟講，都理鬼得你嗰隻係咩恒指熊囉。殺得咁狠開開恒指牛熊證街貨圖咪知囉。今日見下方牛證第一梯隊26000至26099點同第二梯隊25900至25999點，呢兩part各有過千張期指喺度，呢個位咁近真係唔殺你殺邊個呀。再落25800至25899點同25700至25799點呢兩part加埋都有13XX張期指，夾夾埋埋今日開市不消一個鐘大市就食咗3493張期指，果然係趕住收爐。
拜託developer Wilson幫我貼個電話芒貼之後(淘寶買架嘛~頭先咪話今朝一枱都係淘寶囉)，恒指果然愈跌愈有，睇多次恒指牛熊證街貨，依家最貼價嘅就係25600至25699點，呢度有280張期指，不過你都可以當呢度嘅貨殺晒咁滯，殺到落依家見嘅重貨位，其實只係講緊第三層嘅25400至25499點，呢度有相當於726張期指。假設個市真係落到去呢個位殺埋呢堆貨嘅話，講緊同保歷加通道底(25381點)講緊相差20點都無。換言之呢一下再博落，你嘅目標就要望住保歷加通道底。恒指熊(69746)，收回價26507點，同現價有逾800點差距，安全之選。
另外，上個星期有讀者s(真係唔止一個呀)email問滙控(00005)Call得未，唔好咁心急住先啦，依家10點36分，滙控日線圖暫呈「倒T星」並處於保歷加通道底，有半個身仲跌咗出保歷加通道以外範圍，同時SlowSTC(14,3)%K線(5.485)同%D線(27.426)雙雙向下衝，明白依家恒指下行個勢好強，最多%K線等埋%D線，兩線同步踩到落嚴重超賣水平後先至再開Call都唔遲呀！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
