美股隔晚由科技股帶動一波報復式反彈，三大指數升逾1%，以為港股今日有望挑戰二萬五大關，豈料連日高位都見唔返，呢期博反彈就係別太樂觀，有番三幾百點都要收貨。由於美滙指數高企97水平，人民幣滙價繼續走弱，隔晚曾驚見6.98水平，目前喺6.97水平徘徊，阻礙中港兩地股市大力反彈。
恒指今日高開167點，其後升至24872點半日高位後升幅收窄，24900點連影都未見而掉頭，最低見24700點，升幅收窄至114點。中午收市接近半日低位報24732點，升142點；國指則升51點，報10050點，一萬大關失而復得。相對上證指數升逾1%，港股反彈力度更加弱，未知跟OTC場結算有冇關係，可能暫時仍未想放生好友。
美國科技股勁彈，騰訊(00700)昨日創年內新低後，今日反彈3%，中午報收260元。而大笨象(00005)亦喺10日線以上企穩，半日再升近1%，兩大巨頭一共為恒指貢獻近90點，已佔去近三分二升幅。舜宇(02382)跟瑞聲(02018)分別反彈8%及4.7%，所謂物極必反，早兩日插水咁深，今日有咁嘅反彈幅度亦正常，其他科網股普遍升3%或以上。不過阿Man都要提醒一句，科網股今日只係反彈，實難言轉勢，仲有貨喺手更應把握反彈逃生門走佬，無貨嘅當然無謂再追，食住花生靠邊站。
至於汽車股之前跌得咁慘情，難得有消息指發改委降小排量車購置稅一半，汽車股當然又要勁彈。不過內地經濟前景唔被睇好，近日已陸續有大行唱淡內地明年經濟預測，汽車股嚟緊日子難捱，即使減稅亦未必能刺激銷情，對於汽車股，當然亦係眼看手勿動。
財險(02328)公布首三季純利倒退兩成半，股價半日逆市急跌12.5%，拖累阿Man上星期曾介紹過嘅母公司人保(01339)半日亦跌逾6%。阿Man都係嗰句，入得場預咗有機會輸，股價表現不似預期，就要嚴格執行止蝕。更何況之前阿Man未有叫追貨，只係話可以留意住人保，待市況喘穩再考慮上車，家陣大市方向未明，而子公司財險業績又咁嘅款，暫時都係咪手多。
講番個市今日上半場唔多彈得起，暫時大市喺25000點似乎阻力唔細，但呢兩日大市兩度跌至24500點水平均見反彈，淡友都咪太過大安旨意，唔排除喺現水平開始築底，有機會部署反彈。當然大前題係內地及外圍股市生生性性，暫時A股都叫靠穩，而美股似乎更加有無形之手護盤，過埋今日月結或有較明顯方向，總之大市升穿25200點企穩，淡倉就的確要先避一避。個股方面都唔多願博反彈，除非閣下自問眼明手快，近日反彈力度一次較一次弱，走遲半步好易又贏變輸。
麥狄文
(徐狄怡‧證監會持牌人)
