噚日揀咗隻恒指熊(61436)，策略係5分鐘圖出現超買先好落場。拆開恒指5分鐘圖嚟睇嘅話，喺朝早11點15分或者下晝1點40分呢兩個時間，見SlowSTC(14,3)又係由超賣上到去中軸水平，(61436)按兩段時間高低位($0.116/$0.113同$0.112/0.120)嘅平均數$0.1145同$0.121作為買入價嘅話，加上噚日喺《下半part》講過「貨唔多過夜都唔怕」，可能你噚晚見到夜期同美股跌到個人都High；但今朝早恒指一度到升時有無嚇到心肝仔卜卜跳呢？Anyway，依家9點52分，恒指做緊26521點，跌102點，(61436)證價$0.127，夠賺有凸啦掛。
恒指仲插唔插落去，睇牛熊證街貨圖同日線圖我諗大家都估得八九成，至但係今日喺巴士上U盤未完時，見到股王騰訊(00700)做$305，比噚日個低位$305.2仲要低，即係話今日騰訊再創逾52周低位，結果一開，截至依家9點55分為止，騰訊最低見$303，係逾14個月低位。見到咁都真係忍唔住同戰友Jack講：係咪可以留名等穿$300？
即刻開一開個日線圖睇吓隻騰訊，保歷加通道口係就係收窄咗，而SlowSTC(14,3)都就嚟到底，但戰友Jack話「MACD『雙熊』喎」，我都見，9MOM負數區但對比起上一次負數區嗰座「倒影山」，依家睇上去好似只係啱啱開始無耐(當然啦，山有大小之分嘅)，DMI嘅DAX唔使問一定起勢咁上(你見騰訊跌到High High都知咩事)，btw，-DI一定係高走於+DI。唔係唔想幫佢，之但係咁嘅鬼樣，就真係難道一句話「SlowSTC(14,3)到底啦」就夠咩，炒多陣啦，反正SlowSTC(14,3)咁敏感，可以超賣再超賣嘅。
更何況，開埋牛熊證街貨圖睇，26500至26599點嗰924張期指已經全軍覆沒，變相26100至26199點呢990張期指就係重貨區，同現價(10點28分見26393點)計，只係爭293點，再推個市向下行，唔推藍籌唔通等細價股咩？不過啲熊仔好貴，毫幾子真係買唔落手，仲要貼價嗰啲有超過50%街貨，有一隻仲要100%街貨，使唔使咁受歡迎呀！恒指熊(61460)，收回價27568點，同現價有逾千點差距，槓桿約21倍，低街貨成交活躍，Day trade住先啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan
