噚日恒指支陰燭的確為一眾淡友帶來一絲絲希望；不過，今朝等緊地鐵時就見到戰友Jack個WhatsApp：一張騰訊(00700)報價嘅screen cap加多句說話「+26？」(升26蚊嘅意思)，北角都未到，恒指開報32836點，升182點；10點未到返到公司，開電腦同時又開緊恒指圖，呢期我請緊part time妹妹，收嘅CV唔多(可能時下年青人有父幹，唔使好似我哋以前咁返學做part time)；但量少都唔係問題，份CV都唔好咁甩頭甩骨呀…上個網search「resume sample/template/format/examples」總會有份係你喜歡架啦，吓話。
依家10點10分，恒指做緊32819點，升164點，最高價見32942點；開恒指牛熊證街貨睇，上方最貼價嘅熊證係33000至33099點，呢度有相當於507張期指，再上多100點，即係33100至33199點，呢度就有738張期指，雖然未過千，但都已經係重貨區啦。
睇埋下方牛證，最貼價嘅係32100至32199點，呢度有相當於366張期指；重貨區就係31900至31999點，呢度係屬於第三貼價區，有成2227張期指，唔係大家退守喎，只係發行商出咗啲新嘅又貼價嘅證上市比大市「選購」，所以貼價排位上會同噚日有啲唔同。
點都好，呢個格局都由上個月持續至今，愈係超買、愈要上行、愈要食熊證(即使熊證貨量唔多)，而今日恒指有力撐多一下，好明顯就係隻企鵝作怪，今朝U盤升過廿幾蚊，到依家10點20分升10.8蚊，唔係佢仲有邊個？
恒指呢啲樣再Call/牛上去，都係同之前嘅做法差唔多，day trade為主；如果搵個股嚟炒嘅話，老老實實小妹都搵唔到一隻個樣唔係超買再超買嘅個股嚟再Call上去，除咗港鐵(00066)；但認真，港鐵等同公用股，波幅有幾多大家心照，但睇港鐵日線圖嘅話，SlowSTC(14,3)嘅%K線同%D線分別報14.07同9.739，低位%K線升穿%D線，靚仔；MACD嘅Div準備由負數區回升上正數區，且MACD(5,26)同EMA(9)齊齊由熊區上行中，仲有升穿之嫌，呢個係第二個靚仔位；14RSI報42雖然miss咗個低位，但形勢上早兩日已經由低位反彈上嚟：再睇埋日線圖上港鐵噚日升穿咗由1月8日到今築起嘅「下降通道」，今日仲努力地上緊條10天線(45.06元)，就算唔買地鐵Call，甚至正股，都應該給予少少關懷同支持呀；更何況如果你個倉係準備迎接一個唔知幾時會出現嘅大風浪的話，倉位組合上有啲高息、公用股作為「石獅子」，進可攻、退可守呀！
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
