講一講噚日隻恒指牛(67622)先。噚日呢隻貨以平均買入價0.0765元落場，Lock住五分鐘圖嘅中軸線作為下方量度線。呢隻貨Hold到落去下半場2點見指數過線後走人。
如同平時一樣，用10分鐘作為走貨時間的話，期內高低位見過0.083元/0.078元，平均走貨價為0.0805元，即呢一趟平均執4格或4.97%。指數期後向下落返去19900點有穿過，執到4格都算係咁啦。
如果呢隻牛過咗夜嘅，今朝指數高開時走貨仲和味；但如果吉咗倉到今朝開市再開嘅話，用隻恒指牛(67859)一樣可以。
按今朝Patreon出文時間為10點6分，如常的用10分鐘作為睇文時間的話，則於10點16分再睇返個走勢圖，五分鐘圖上見指數已經出咗支「大陽燭」一棍抽高上行返到20093點畫到頂線後稍回，同時亦見整條保歷加通道向上運行中，Slow STC(14.3)兩線未到超買，再博住上嘅話就要借線上，但可惜彈高後最近10線都需要啲時間先至追到指數，兩個方法：一係硬追好倉但要預捱一捱向下Swing一趟；一係等指數同返啲平均線靠近且企好之後先至出動。
按作戰室嘅Perfrence，啱啱嗰啲位都真係好倉爬格位，手快者反手淡倉博指數唔過線20093點嘅頂線向下；耐性派就等指數回定後先至再出好倉，始終指數仍然企近熊證街貨層，出好倉有利同相對易搞啲。
等10點45分指數低走10線，再等到11點指數低走20線，再等到11點5分，終於見指數喺40線上出現「錘頭」，比多五分鐘時間開始轉向上，吼呢個位小注掟隻(67859)亦係今日作戰室其中一注。
同以10分鐘作為買入時間的話，期內高低位做過0.084元/0.072元，平均買入價為0.078元。
落場後剛好再撞正恒指一棍抽高，頂返住20093點呢條頂線之後再上，日內新高有見20205點，將熊證嘅重貨區20100至20199點確認全數收回，但高走過後指數都係閃燃並留底上影線一條，快嘅當然可以喺呢個走即走；但遲嘅，重新再借保歷加頂線同10線行swing的話，就即係捱一次Swing完之後再上多一次，出下一個Exit格仔位。
午前指數有見企好喺10線，五分鐘圖高位「圓底」生成，頸線水平大約於20162點。午後，指數初段繼續借住10線上，但可惜遲遲未見爬返上頸線樓上，反過來一支陰燭向下一落直踩過10線再到20線位，同時亦回一回落去20100點呢個位，講緊嘅係依家1點25分恒指五分鐘圖嘅情況。
嚴守策略，線過即走。以1點20分見指數向下過線後走隻(67859)期內高低位見過0.085元/0.08元，平均走貨價為0.0825元，呢一趟平均執4.5格或5.45%，都係唔算多應該係出貨位遲咗。
正數就得啦！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
