隔晚道指低開156點，跌幅一度擴至215點，低見36029；標指曾挫1.04%，納指最多大跌1.72%，但到尾市跌幅收窄。道指跌幅縮至41點，標指跌24點；納指跌不足1%，跌119點。不過反映中國概念股表現嘅金龍指數回落2.09%。科技龍頭股有高管沽貨套現，亦說明咗美股現價估值偏高，Facebook母企Meta行政總裁朱克伯格披露兩年來首次減持公司股份，涉近1.85億美元，Meta股價應聲下跌1.5%。不過Meta今年以嚟已勁升逾1.7倍，噚日嘅跌幅只係杯水車薪。
至於港股真係弱過藥煲，完全唔識反彈，今日繼續插水，再創今年新低。恒指低開39點，開市價16606已經係今早高位，其後跌勢加劇，半日最多跌313點，見16332半日低位，亦創今年新低。半日恒指跌幅略為收窄至292點，收報16353；國指跌82點，報5621；恒科指繼續跑輸，跌76點，收3683。半日成交額591億元，嚟到呢啲年內低位，尚未見有較多資金流入抄底，港股目前係蔗渣價錢都無資金肯買。
隔晚Meta嘅朱仔減持套現，唔多唔少都影響到科網股氣氛，人哋納指跌唔夠1%，但港股呢邊恒科指可以半日跌2%，真係無話可說。之前較為硬淨嘅網易(09999)半日跌4.7%，失守160元關；百度(09888)跌3.4%，美團(03690)跌2.5%，京東(09618)跌2.4%，騰訊(00700)及小米(01810)跌2.2%，攜程(09961)跌近1%；阿里巴巴(09988)跌0.8%，算係跌得少。
金融股表現疲弱，港交所(00388)半日跌逾半成，再創逾一年新低，執笠咁款，缸邊友戲言，乜嘢工作小組研究優化港股市場，愈優化愈墮落，究竟呢個小組搞邊科。友邦(01299)保險半日跌4.4唔好得去邊；平保(02318)跟國壽(02628)半日跌近2%。至於幾大內銀股跌逾1%，最本事係大笨象(00005)，半日跌0.1%算跌得少。
其他藍籌個別發展，聯想(00992)又係高層減持惹的禍，股價半日跌6.5%表現較差，不過都差唔過噚日急跌逾兩成後停牌嘅藥明生物(02269)，復牌順手發盈警，半日再跌11%，藍籌之中表現何止係最差，兩日累跌三成，以藍籌股嚟講，都可以話破紀錄。舜宇光學(02382)半日跌4.3%，之前彈得好地地，呢兩日又走晒樣。幾隻內需消費股齊受壓，其中百威亞太(01876)半日跌5%；海底撈(06862)、康師傅(00322)及蒙牛乳業(02319)跌3.3%至4.3%。比亞迪(01211)半日反彈1.6%，係表現最佳藍籌。
恒指嚟到現水平，重牛區16300至16700嘅牛證幾乎去無存菁，但牛死牛還在，估計缸邊友仍然係博返彈居多，口痕友睇死港股要殺清所有牛證，發行商要去到牛證都出唔切嘅絕境，港股先有望反彈，如此一來，咪要落到15900至16000先識得停?? 不過去年11月10日至11日遺下巨型上升裂口，16100至16800左右，要完全回補整個裂口，落去16000至16100水平就啱啱好。
麥狄文
(徐狄怡‧證監會持牌人)
