隔晚美股繼續高位徘徊，業績期展開，大部份企業都交到功課，業績表現市場收貨，股價多數有得升，支持美股高居不下。從第一季標普500企業盈利只下降3.3%計算，盈利倒退幅度遠勝預期，第二季至今業績也是倒退有限，估計下半年將步入單位數正增長。呢個係令投資者對美股愛不釋手嘅原因，只要美國經濟唔陷入衰退，通脹受控，企業盈利交到功課，美股可以繼續高位徘徊，只係目前再大升空間有限，有貨嘅就坐定定，無貨嘅唯有等調整買入。
至於港股，隔晚喺ADR及夜期表現唔錯，一度重上19000大關，加上人行出招穩住人民幣匯價，人仔轉強，在岸及離岸價均升穿7.18。港股兩日跌逾400點後，今早恒指高開50點，升幅一度擴大至263點，見19215半日高位，可惜50天線(19212)得而復失，更由升轉跌，一度倒跌35點，見18916半日低位，幸而20天線(18976)仍守住，暫時喺19000關爭持。
半日恒指收報19001，升49點；國指升26點，報6407；恒科指跌11點，收4103。半日成交額590.07億元，留意上日狂掃貨淨流入165億元嘅北水，話咗佢變心快過打針，半日錄得淨流出超過71億元。
雖然國務院發布「促進民營經濟發展壯大」意見文件，加大對民營經濟政策支持力度，亦提到推動平台經濟規範健康持續發展，被市場視作出招救經濟，但睇真啲又係打嘴炮，未有乜嘢實際政策去扶持經濟發展。呢啲咁嘅情況，已屢見不鮮，大市升抵50天線，未能企穩，雖未至打回原形，但升幅大大收窄，日線圖出咗咁長枝避雷針，暫時好難睇返好後市。
科網股衝高後回落，雖然仍保持半日升幅，但升幅縮水，個別股份更倒跌，拖累恒科指表現。重磅科網股表現好壞參半，京東(09618)、騰訊(00700)跟美團(03690)半日維持不足1%升幅，但網易(09999)、阿里(09988)跟百度(09888)則倒跌。
人行出招穩住人民幣匯價，內銀股跑贏，大部份錄得超過1%升幅，建行(00939)半日升0.7%算水皮。至於內險股表現麻麻，平保(02318)半日無起跌，國壽(02628)半日則跌0.5%；友邦(01299)跟港交所(00388)偏軟，前者更跌1.8%。
內地正考放鬆一線城市購房限貸政策，內房股跟物管股炒上，碧服(06098)升5.5%，為表現最好藍籌；龍湖(00960)及碧桂園(02007)均升4.3%。不過就算阿爺真係放寛城市購房限貸又如何，內房企業面對嘅係銷售一直未能重回正軌，有房賣不出，係因為人口老化，人口負增長外，仲有經濟下行，降級消費，以及青年失業率高企等等，結構性問題出現，並唔係啲人有冇本事去貸款買房，就算再放寛限貸，一樣係無人借錢買樓。內房一日未能解決債務危機及銷售問題，都好難翻生，間唔中有消息或政策出台，只係推動股價彈一彈，有波幅，冇升幅情況仍未能改變。
值得一提係舜宇(02382)發盈警後，被大行大幅降低目標價，股價半日大跌13.2%，有貨係手，一開市又走避不及。阿Man成日都話要buy and hold唔好再揀港股，就算短炒港股都難度甚高，與其話炒美股因為時區不同無得瞓，不如話買咗港股瞓唔著更為貼切，至少美股坐住貨，唔做孖展肯坐肯守，都仲有覺好瞓。
P.S 明日因事假，<<盤房來料>>暫停一天，下周一回復正常
