熱門:

2023年3月28日 即巿股評 港股直擊

【盤房來料】港股現水平值博率有限

矽谷銀行(SVB)跟Signature Bank成功拆骨出售,而且售價亦未至於太低賤,銀行業務都仲係值返啲錢,帶動銀行股反彈,道指最終升194點,標指則升6點,暫時守穩3900水平。不過,銀行危機略為紓緩,債息回升,科技股又面臨壓力,納指則倒跌55點收市。港股連續兩日下跌近500點後,今早反彈,雖然重上100天線(19699),但20天線及250天線未能收復,甚至成為短線阻力。

恒指高開120點,其後升幅擴大至229點,見半日高位19796,但20天線及250天線遇阻,一度倒跌8點,見19559半日低位,不過10天線(19535)有支持,已連續兩日守住10天線,大市又回復升勢,半日仍錄得過百點升幅。恒指半日報19707,升139點;國指升46點,報6695;恒科指升21點,收4127。半日成交額縮水至519億元,雖然低位有承接,但買貨意欲似乎有限。

藍籌股半日個別發展,成也騰訊(00700),敗也騰訊,騰訊半日升4.1%,唔單只係最大升幅藍籌股,更為恒指貢獻近半升幅。其他科網股普遍反彈,只有阿里(09988)半日跌1.6%;美團(03690)跟京東(09618)分別反彈0.4%及1.1%,百度(09888)亦升0.7%,暫守150元水平。美國銀行危機暫時解決,隔晚美股嘅金融股反彈,友邦(01299)跟大笨象(00005)半日分別升1.9%及1.5%。

除咗本地金融股反彈,內險股半日亦有不俗表現,財險(02328)公布業績,去年多賺兩成,亦增加派息,半日爆升一成,母公司人保(01339)亦升2.3%,其他內險股普遍升1%或以上。藍籌之中表現最差係剛公布去年盈利跌逾三成嘅康師傳(00322),半日跌11.3%。依家藍籌股升跌一成過外變成等閒事,咁嘅波幅,正常基金同機構投資者又點肯同你長線坐定定。

隔晚油價反彈逾5%,主要係庫爾德暫停原油出口,今日石油股全線向上,但升幅溫和,中石油(00857)升0.5%,中石化(00386)升2.2%,中海油(00883)升1.1%,中海油田服務(02883)升2.8%。

港股基本上乏善可陳,雖然上周跌破萬九關後即反彈,並重上二萬大關,可惜未有企穩20天及250天線,暫時大市都係反覆,升升跌跌,個別板塊及股份即使有炒作,亦只係小打小鬧,市場缺乏新資金流入,無成交配合,大市始終難擺脫有波幅,冇升幅嘅悶局。臨近期指結算,指數仍然反反覆覆,即使結算後,過幾個交易日又到復活節長假期,長假期前買貨意欲更低,依家呢啲時候,都係食吓花生算,現水平嘅港股,真係無乜值博率。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads