美國接連有家中小型銀行出現流動性問題，中小型銀行股隔晚暴瀉，市場擔心矽谷銀行（SVB）爆煲事件會愈演愈烈，甚至演變成2008年金融海嘯2.0，美股由升轉跌，只有納指仍錄得近50點升幅，標指一度反彈至3900阻力位後回軟，收市跌5點；道指亦跌90點。港股噚日反彈376點後，今早回復弱勢，盤中一度跌逾500點，更曾失守100天線(約19312)。
恒指低開171點，早段跌幅曾收窄至56點，見19639半日高位，無奈沽壓再現，加上A股勢弱，恒指一度跌502點，見19193半日低位，亦創12月21日以嚟低位。臨中午收市前跌幅收窄，其後收復100天線，恒指半日跌360點，收報19335；國指跌120點，報6470；恒科指跌81點，收3809。半日成交額696.66億元，似乎資金喺呢啲低位，仍唔多肯入場，令成交繼續淡靜。
藍籌股整體表現麻麻，大笨象(00005)以1英鎊收購矽谷銀行英國公司，但需要注資20億鎊，股價半日跌半成，藍籌之中表現最差。友邦(01299)半日跌3.7%，平保(02318)亦跌2.1%，就連強勢嘅石油股亦腳軟，三桶油跌幅由超過2%至3%不等。一直強勢嘅中移動(00941)，亦跌1%，半日過千隻股份下跌，強勢股都唔例外。中芯(00981)係少數逆市上升股份，半日升4%，藍籌之中表現最好。
電動車減價戰展開，汽車股跌到一仆一碌，再有傳言指Tesla停用部份電池報道，但比亞迪(01211)指報道失實，股價半日仍要跌3.8%。其他汽車股全線下跌，跌幅由超過2%至7%不等。
內房股沽壓沉重，唔係阿Man一直睇死內房股，而係內房股債務問題爆鑊後，跟本失救，主要係銷售未能回復，銷售大不如前，現金流問題未能解決，債務問題唔惡化已經偷笑，內房股又邊有可能回復往日風光。整個內房股跌到七個一皮，佳兆業(01638)復牌後連番下挫，半日再跌逾半成。其他二線內房股跌得深，插得狠，閒閒地跌半成以上；國企內房股算係跌得少，華潤置地(01109)半日跌2.2%，中國海外(00688)跌1.5%。
公用股成為資金避風港，逆市上升，中電(00002)升1.8%，電能(00006)升2.5%，港燈(02638)漲0.8%，煤氣(00003)升1.8%，長江基建(01038)升1.6%，粵海(00270)漲2%。金礦股亦係跌市中嘅綠洲，金價重上1900美元，升至六個星期高位，金礦股逆市向上，板塊內股份錄得1%至5%升幅。
港股暫時依然弱勢，呢兩日仍未能重返250天線之上，岌岌可危，暫時總算守咗100天線，同時亦係12月跟1月份低位，一旦100天線再失守，下破19000考驗18500水平機會極大。
麥狄文
(徐狄怡‧證監會持牌人)
