隔晩美股顯著下跌，主要係市場再度憂慮通脹回落速度太慢，通脹仍高位令加息步伐加快，10年美債息升至3.9%，對美股自然係利淡，三大主要指數跌逾2%。至於港股半日先跌後回穩，噚日已失守50日線(20786)，目前喺20500水平爭持。恒指低開17點，其後因為人民幣離岸價跌至1月初低位，A股亦走軟，拖累恒指最多跌184點，見半日低位20344。不過今日係財爺波叔發表新一份《財政預算案》，大市止跌回升，最多倒升91點，見20621半日高位。半日恒指收報20534，升5點；國指報收6880，跌44點；恒科指則跌36點，半日報收4121。半日成交額676.98億元，較上兩個交易日有所增加，似乎今早低位都有啲趁低吸納買盤出動。
藍籌股個別發展，雖然大笨象(00005)噚日中午公布業績後先升後回，但喺ADR表現勇猛，股價升越60元水平，今早大笨象表現唔錯，半日升4.9%，係最大升幅藍股。其實大笨象已預告派特別股息，加上季度業績好過預期，噚日下半場先升後回反而唔多啱數，今日升亦合理，只係60水平嘅大笨象，追入值博率唔高，現價已反映業績優於預期及預告派息等因素。不過大笨象嘅理想表現，帶動一眾本地銀行股做好，一般人嘅邏輯都係債息升，有利銀行股息差利闊，不過阿Man反而係認為作為百業之母，經濟好， 銀行股自然好，經濟差，再加息，對銀行股都未必好有利。本地銀行股升幅由0.2%至2.7%不等，雖然唔算多，但呢個板塊總算逆市跑出。
至於其他藍籌股，科網股普遍先跌後回穩，百度(09888)跟美團(03690)半日倒升，前者升3.2%，後者半日升近1%。但騰訊(00700)跟阿里(09988)半日仍要跌0.5%及1.7%；京東(09618)噚日因為有消息指下月要以百億補貼搶市場，未知會否掀起減價戰，噚日股價急跌後，今日半日續跌2.4%，盤中低見182元，180元支持睇守唔守得住。明日派成績表嘅港交所(00388)半日跌0.7%，暫時320元料有支持，出咗業績再睇佢乜料。半日表現最差嘅係創科(00669)，其主要客戶家得寶，警告需求疲弱，隔晚股價急跌，拖累創科半日跌6.1%。
話咗電力股短炒作勿高追，早兩日逆市升嘅電力股，今日全面受壓，潤電(00836)跟中國電力(02380)半日跌逾3%，其他電力股跌0.7%至2.4%不等。中國乘聯會預計，2月乘用車零售銷量135萬輛，按年增長7.2%，數字都算唔錯，但汽車股隨大市下跌，汽車三傻跌1.6%至3.5%，龍頭比亞迪(01211)跌1.3%，吉利(00175)亦跌1.2%。
港股早段低見20300水平，距1月4日嘅上升裂口20200僅一步之距，目前回補呢個裂口跟考驗250日線20028嘅機會仍在，尤其下周一期指結算， 大戶平本月初開嘅淡倉，已大獲全勝，呢幾日期指轉倉高峰期，食糊兼部署下月倉位亦係時候。若然呢兩三日大市回補埋20200裂口，再下試250日線即20000水平守得住，甚至出現單日轉向V型走勢，有機會呢一輪嘅調整浪完成。留意下月內地兩會舉行，唔排除本月完成調整後，下月上旬借兩會消息拉動股市向上，如此一來，目前可以買返啲權重指數股，等待完成調整後再展升浪。
麥狄文
(徐狄怡‧證監會持牌人)
