熱門:

2022年12月13日 即巿股評 港股直擊

【盤房來料】港股高位反覆震盪 回調壓力尚算溫和

市場仍等待今晚美國嘅CPI數據,會否對周四FOMC議息或會後聲明顯露一啲倪端,隔晚美股三大指數造好,全部升逾1%。目前阿Man對美股後市仍審慎樂觀。至於港股則略為回升,主要係港府進一步優化安心出行使用指引,取消黃碼可方便旅客;同時亦有傳聞指中港兩地最快可於1月上旬恢復通關,更有資料指中港兩地高鐵已有最新列車時間表安排。

恒指低開5點,一度跌81點,見19382半日低位,其後止跌回升,最多倒升244點,見19707半日高位。臨近上半場收市,恒指升幅削半,半日恒指最終收19572,升109點;國指升42點,報6671;恒科指升28點,收4220。半日成交額縮水至只有686.2億元,都係意料中事,由於月底係聖誕節及新年長假期,資金變得審慎保守,甚至提早收爐亦可理解。

藍籌股個別發展,友邦(01299)半日升1.1%,港交所(00388)半日靠穩升0.4%。至於ATMJ四大天王,只有京東(09618)半日跌0.3%,騰訊(00700)、美團(03690)跟阿里巴巴(09988)則維持上升,亦係帶動大市今日反彈嘅動力。不過,隔晚喺美股回升之際,反映中概股嘅金龍指數逆市下跌,相信科網股都唔頂得幾耐,係時候回調整固。

上星期係威係勢嘅舜宇(02382)噚日公布11月份手機鏡頭出貨量下滑,周一急跌12.6%後,半日再跌3%。另一個撐起大市嘅板塊係本地地產股,有消息指中港兩地最快下月初可免檢疫通關,本地地產股全面造好,主要係市場憧憬恢復通關可帶動本港經濟,尤其零售市道,過去受疫情影響嘅購物商場應可回復生氣。

內房股表現疲弱,繼碧桂園(02007)兩度配股後,大股東又減持碧服(06098);今日就輪到德信(02019)折讓兩成配股,股價半日跌17.3%。富力(02777)努力解釋稱聯合創始人張力案件,對公司業務營運唔會有重大不利影響,但股價半日插水13.6%。其他內房股閒閒地跌一成以上。

生科股今日見回吐,雖然內地成藥搶購潮,帶動個別醫藥股造好,但今日醫藥股整體表現疲弱,板塊內股份普遍出現回吐。不過歌禮(01672)新冠口服藥獲積極I期臨床結果,半日逆市升4.5%。

港股升抵19000水平後,暫時高位整固,大市回調壓力唔算大,不過喺成交縮減下,短線再上升動力亦缺乏,相信港股嚟緊一段時間,可能喺19000水平反覆震盪,只要恒指仍能守住10天線(19215),後市仍向好,而20天線(18489點)及100天線(18297點)將會喺好友嘅最後防線。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads