歐洲央行對息率走勢轉走鷹派，表明下個月加息，而10年期長債息高企於3厘之上，資金又再度risk off，美股三大指數顯著下跌，拖累噚晚夜期跟ADR回軟。港股今早低開，一度跌逾400點，但半日跌幅大大收窄。
恒指低開346點，報21522，其後一度跌381點，見21487半日低位，但10線(21452點)有支持，加上內地CPI數據略低預期，大市跌幅收窄，最多倒升59點，高見21928，其後又回落。最終恒指收報21828，跌40點；國指升12點，報7618；科指半日升0.9%，收4792點。半日成交額只有768.32億元，周末前夕，市場資金審慎。
今日至巴閉都係阿里巴巴(09988)，噚日收市後一度有傳聞指旗下螞蟻集團將重啟IPO，夜期一度拉升至22200水平，其後相關傳聞遭中證監跟螞蟻否認，阿里隔晚喺美股跌8%。今早阿里低開，但跌幅又唔算勁，中午更倒升近2%，似乎港股呢邊嘅投資者，傾向相信螞蟻集團就算暫時未重啟IPO，上市集資只係遲早問題。至於其他重磅科技股，ATMJ全線向上，騰訊(00700)半日升0.1%；京東(09618)倒升0.8%。不過金融股普遍向下，友邦(01299)喺80水平爭持，大笨象(00005)就跌1%，內銀股偏軟。生科股普遍回吐，連續幾日反彈，今日都要抖抖，板塊內股份跌幅由超過1%至4%不等。
波羅的海指數繼續走軟，市場研究機構Drewry編制的全球貨櫃指數，隔晚公布每40呎櫃標準箱價格為7579美元，連跌15周，航運股捱沽。將成為藍籌新貴嘅東方海外(00316)半場跌3.4%，其他航運股亦至少跌3%以上。
中國乘聯會公布，5月乘用車市場零售135.4萬輛，按月增長29.7%，汽車股整體向好，板塊內股份，閒閒地升3%以上，長汽(02333)半日升幅更逾半成。比亞迪(01211)持續破頂，公司已將A股回購價提高上限至400元，相對現價仍大把水位，似乎呢隻係逢回吐吸納股之選。
港股強勢仍在，雖然22000阻力較大，不過回吐壓力有限，加上阿里有關螞蟻IPO嘅消息彈出彈入，市場亦視之為無物，只要美股無再現出較大幅回吐，港股再一次上試22000-22500嘅機會仍在，問題係22600點頸線一日唔升穿，都好難確定港股已步出熊市陰霾。
麥狄文
(徐狄怡‧證監會持牌人)
