隔晚美股表現反覆，三大指數下跌，未知反彈會否告一段落。美股5月份表現未太差，道指跟標指幾乎無起跌，只有納指跌咗2%，目前美股資金流動性仍充裕，要睇嚟緊6月聯儲局開始縮表，對流動性有冇影響，暫時美股仍處於熊市反彈浪之中。至於港股，同樣處於反彈之中，恒指過去幾日反彈逾千點，短線已呈超買，今日借財新中國5月製造業PMI連續3個月處於收縮水平呢個理由回吐，不過恒指暫時仍穩守50天線(20968點)，並守喺21200水平，反彈未必咁快玩完。
恒指低開7點，一度見過21411點半日高位，不過內地公布財新製造業PMI數據後，大市急轉直下，半日最多跌232點，見21183，不過50天線守得唔錯，其後大市跌幅收窄。半日恒指跌159點，收報21255；國指跌92點，中午報7324；恒科指半日跌77點，收4406。半日成交額764.93億元，未見有太大分別，嚟到21000水平，資金顯得更加審慎。
藍籌股普遍回軟，早段友邦(01299)跟大笨象(00005)逆市向上，但至中午收市友邦已隨大市倒跌0.1%，大笨象則仍保持1%升幅。至於其他內銀及內險股普遍回軟，但跌幅唔算顯著，只限於1%之內。 喺今次反彈浪中，一直落後嘅港交所(00388)終於肯發力，半日升1.1%，不過咁嘅升幅相對之前帶領大市修復多條移動平均線嘅重磅科網股，港交所仍然落後得交關。
科網股經過一輪猛力上衝後，今日見回吐，上海今日開始全面回復正常生產生活秩序，市場就有藉口沽一沽美團(03690)，因為可以自由活動，唔使宅喺屋企叫外賣，半日美團回吐3.2%。美團近日好明顯成為大戶舞高弄低指數嘅工具，每日波幅動動輒3%以上，短線三幾日之間可以升跌一兩成，呢一種波幅過往又豈會出現喺藍籌股身上，慎防明日派完季度成績表，美團股價又見大幅波動。其他科網股半日普偏回軟，早兩日升得咁勁，今日回吐一下都好正常。
內地為穩經濟推包括開展新能源汽車下鄉政策促進汽車消費，汽車股逆市繼續走強，龍頭比亞迪(01211)更創年內高位，其他汽車股大多逆市向上，當中以4S股中升(00881)跟永達(03669)半日升4.9%及8.8%表現最強勁。
港股由20000水平反彈逾千點至21000水平之上，雖然已修復多條移動平均線，但暫時仍未見有大量資金入場，成交額唔足以令人相信大市就此轉勢，暫時只能視為反彈，而反彈浪能否持續走落去，仍有賴於資金支持。阿Man暫時都係維持大市上落市格局睇法不變，只不過移動區間似乎正一級級上移，短線大市喺21400至21600阻力唔細，而支持則喺20800至21000點，21200點能否企穩，係挑戰上方阻力，或下試支持位嘅關鍵。
麥狄文
(徐狄怡‧證監會持牌人)
