噚日喺朝早出咗隻恒指熊(67666)，由於噚日恒指最大嘅跌幅都係朝早開市後15分鐘出現晒，所以隻(67666)都預咗要揸耐少少，甚至只可以做到爬格仔注。持貨到下半場嘅時侯，其見小時圖Slow STC(14,3)兩線已經落到超賣至嚴重超賣水平，於是就決定睇下條Slow STC(14,3)到底會係觸底，還是行出超賣再超賣。還好不負所托，Slow STC(14,3)行出超賣再超賣嘅走勢，喺2點至3點呢粒燭更加失守150小時線(小時圖150線)，及至最後一個鐘，都係未見指數有任動反方向嘅動作，過唔過夜，博日線圖指數失20天線後再無天線支持而垂直插就大家自由發揮啦，留一半走一半鎖定部份利潤亦得；做DT割禾青的話，以最後一小時圖走隻(67666)，按期內高低位0.121元/0.109元計，平均走貨價為0.115元，呢一趟平均賺幅有15%。
噚晚玩玩下電話收個Push message話「據報國產遊戲版號重啟核發」，本以為騰訊(00700)、網易(09999)會翻生，誰不知原來佢哋都唔喺個List度，怪不得今朝早恒指開升70點之後，15分鐘之後已經見到升幅收窄，高開低走隨即出現。不過，於五分鐘圖上其實有唔少平均線做緊指數支持，依家9點56分，指數高開低走完之後，目前見到有50分鐘線(五分鐘圖10線)同250分鐘線(五分鐘圖50線)作勢做住支持；即使失守，100分鐘線(五分鐘圖20線)亦做到「阿星接力」。
但如果以恒指牛熊證街貨圖嚟睇嘅話，指數其實又值得繼續開淡倉，原因只得一個，就係指數靠近牛證街貨，今日見由於噚日無新熊上市，所以最貼價仍然都係22000至22099點嘅熊，至於牛證被殺退至21100至21199點，其實呢度都有九層差距；但隨住今日見到熊證有新證上市，最貼價收回價落到去21700至21799點呢度，即係話今日嘅牛熊證中間位就係(21700+21199)/2=21449.5點，同依家10點3分做緊嘅21205點，計極都係同下方牛證街貨層比較近。
恒指熊(68768)，收回價21792點，同現價有近500點差距，為市場上最貼價熊證當中，槓桿最高嗰兩隻之中，成交最活躍。五分鐘圖見Slow STC(14,3)由今朝接近超買水平向下回落到依家接近超賣位，就不如等下Slow STC(14,3)彈返上超買位先至再出場啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
