美股隔晚先跌後回穩，道指盤中曾跌逾300點，市場逐漸消化聯儲局再放鷹，三大指數最終倒升收市。不過港股則持續疲弱，恒指今日反覆偏軟，半日跌逾100點，但仍守於20日線之上。恒指今早低開141點，其後跌幅擴大，最多跌240點，見21568半日低位，但20線上見支持，大市跌幅曾大縮至1點，見21807點半日高位。可惜今日係周末前夕，缸邊友普遍選擇減倉渡周末，中午沽壓再現，中午恒指挫逾百點收市。恒指半日收報21684，跌124點；國指跌82點，報7412；科指跌101點，報4373點。半日成額只有539億元，周末前夕市場較保守，預咗買賣兩閒。
藍籌股個別發展，噚日逆市向上嘅李寧 (02331)跟安踏(02020)雙雙下跌，兩股齊齊跌逾5%，藍籌之中包辦倒數頭兩名，有分析指內地零售第一季表現或見紅，出現負增長。美國加速收水，美息趨升，金融股偏強，大笨象(00005)半日逆市升0.5%，友邦(01299)更有份撐住大市，令恒指20日線得以守穩，半日升1.5%。俄羅斯原油或減產，石油股向上，中海油(00883)半日升3%，為表現最好嘅藍籌股。市場憧憬阿爺或穩經濟，隨時命人行降準降息，內銀股偏軟，建行(00939)跟工行(01398)半日齊跌0.2%。
美國反映中概股嘅金龍指數呢幾日表現強差人意，香港呢邊嘅科網股亦走軟，ATMXJ隻藍籌科網龍頭全部下跌，當中美團(03690)再被紅杉資本始創管理合夥人沈南鵬減持，半日股價跌3.5%，不過股價仍守於150元之上，若然股價下試20日線(148元)靠穩，阿Man想入返啲貨作中長線部署。京東(09618)半日跌3.4%，半暫時喺首個線支持位220左右爭持，已經完全回補3月17日嘅上升裂口，正路呢啲位唔會再落太深，可以喺215-220之間收集，跌穿200止蝕。
歐盟向俄羅斯實施新制裁，當中包括煤炭，市場憧憬煤價上升，煤炭股呢個板塊持續做好，今日跌市中表現較為突出。雖然易大宗(01733)半日升4.3%，係板塊升幅冠軍，但要揀煤炭股，都係揀返兗礦能源(01171)同神華(01088)呢啲龍頭穩陣。
麥狄文
(徐狄怡‧證監會持牌人)
