噚日揀咗隻恒指牛(55669)出嚟，講明見小時圖踩得到10小時線(小時圖10線)先至落場，不過噚日小時圖見指數喺條10小時線上施展「輕功水上飄」，六師弟根本都無踩過條線，(55669)出唔到場。尾市時見到小時圖Slow STC(14,3)兩線都上到嚴重超買水平，而保歷加通道又唔係拓闊中，心諗：算啦，可能第二日六師弟食多咗，飄唔起呢。
結果，六師弟今日飄得起，恒指開市升170幾點，上返22000點之餘仲比多100點。到正式開市後，唔駛3分鐘，指數再向上飆到上22200點以上位置，熊證首三層街貨即時被收回。開市後過咗20分鐘，指數仲上高啲，爭9點就到22300點。「有無後悔無出到隻(55669)過夜？」無，至少自己睇啱方向，同埋今日見隻(55669)街貨有成31%(咁多人買嘅)，而指數同(55669)收回價22148點嘅距離又遠咗，所以槓桿得返約21倍，當係比個機會我重新揀過隻再貼啲嘅、再高槓桿啲嘅去追。(有無刀仔借嚟拮大脾？ヽ(#'Д´)ﾉ)
依家10點10分，喺五分鐘圖上就正正見住指數爭9點上到22300點嘅時侯向下回落，不過，50分鐘(五分鐘圖10線)其實都好快上到嚟接住指數，等咗成半個鐘有多，終於都有條線嚟做下量度位，睇下開邊一開邊倉啦。
不過，以日線圖同街貨圖計，其實仍然係開好倉比較有利。喺日線圖上，噚日畫嘅「小圓底」都已經成形得八八九九，指數今日都再進一步迫近頸線，就算今日指數最終係見下行，只要日線圖上唔穿過10天線的話，咁「小圓底」形態就仍然保留。
街貨圖上其實噚日行完U盤收市後，指數已經企咗上去第一層嘅熊證街貨層(以噚日計為21900至21999點)。及至今早開市前睇牛熊證街貨圖，見到牛熊兩邊街貨終於再次近返，兩邊者只爭一層嘅差距，但由於指數率先踩入熊證街貨層，而近熊嘅街貨的確比近牛嘅多，咁嘅情況之下，指數向上再殺，整靚今日期結日+Q1結算日，又何樂而不為呢？
恒指牛(63991)，收回價21778點，同現價有逾400點差距，槓桿約44倍夠做DT，今日新上市所以未見有街貨，一如以往等五分鐘圖上Slow STC(14,3)兩線回落返去超賣水平先至進場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
