雖然市場已開始消化加息步伐可能加快嘅事實，但美俄關係惡化，令油價再度抽升，拖累美股下挫，但港股不太受美股下跌影響，即使騰訊(00700)業績麻麻，港股低開後亦能止跌回升，半日更挨近高位收市，似乎暫時淡友無法反攻。
恒指低開151點，雖然早段曾跌253點，見21900半日低位，但美股期貨回升，港股亦收復二萬二失地，中午收於半日高位。恒指半日倒升41點，報收22195；國指升26點，報7661；恒科指跌10點，報4739。不過半日成交額只有781.45億元，未見顯著上升。相對上周逾2000億元成交配合反彈，港股嚟到22000水平，明顯上升動力已減退。加上空軍嘅沽空冚倉盤已完成冚倉行動，成交當然難以維持上周咁活躍。
藍籌股個別發展，雖然息口趨升，但大笨象(00005)之前嘅升浪，已反映加息預期，股價無再隨債息高企再升，今日反而回吐1.3%，唔係阿Man睇死大笨象，股價要重上60元水平又談何容易。一對體品股安踏(02020)跟李寧(02331)半日再升逾3%，前者今日先發力，後者則再下一城。中移動(00941)豪派高息，半日升4%，暫已錄得七連升。
至於騰訊，第四季業績強差人意，股價半日跌3%，呢個跌幅，真係唔算多，暫時叫守住370元，主要係現價估值已變得合理，就算業績麻麻，仍然支撐到股價企喺呢啲位。其他重磅科網股個別發展，今日略為偏軟，但沽壓唔算大。舜宇(02382)喺今個反彈浪中算係弱勢，啱啱仲要畀大行調低目標價，股價半日跌6.3%，同業瑞聲(02018)就一直係弱煲股，今個反彈浪可以話無乜點彈過，半日亦跌3.1%，成為表現最差兩隻藍籌股。
雖然內地疫情反覆，但餐飲股今日見反彈，海底撈(06862)業績轉盈為虧，但收入增逾43%，半日飆8.6%，為表現最佳藍籌；由於有資金流入呢個板塊，其他餐飲股亦跑出，升幅由超過3%至6%不等。除咗餐飲股，生化科技股亦見資金追捧，之前呢個板塊被血洗，依家個市定咗落嚟，個別質素高啲嘅龍頭股，吸引長線投資者買入，好似藥明生物(02269)同信達(01801)近日都見有基金增持或入場，換句話講，當佢哋再次回調，可以考慮撈返啲，但今日急升就無謂追喇，反正個市喺22000水平，將要整固一段時間，期間上上落落，總有回吐機會畀位你上車。
麥狄文
(徐狄怡‧證監會持牌人)
