噚日喺作戰室膽粗粗午後再出淡倉，目標落返18500點，結未3點未到佢就到咗，完成目標走人之後，指數再冧，18400點都失守埋，向18300點衝落去，最後連18300點都無埋。回顧返指數對上一個咁低嘅位係2016年10月15日，低見18278點。3點5分港股低見18235點嘅低位，終於都穿過2016年嘅低位，再向前數下一個低位就係2011年10月嘅16170點，以目前市場上嘅牛證最遠收回價為14000點，OK嘅，只不過係可能當初連發行商都無諗到指數咁樣向下殺落去，所以你會發現收回價18000點以下嘅牛證，再對落嘅貨其實唔係層層都有，所以今日見到恒指牛熊證街貨圖上，除咗係000/500點做尾嘅整點數位有長城築起咗之外，其餘層數嘅街貨量唔係好多，唔係無人入，而係無證可以入。
呢一個月來指數由2月10日嘅高位20505點一直跌至噚日低位18235點，累跌6815點期間，見到有唔少資金每日都跑緊捉反彈嘅接力賽，跑足一個月之後，今日終於都被佢哋跑贏一次，隨住隔晚美股造好，港股今早開市大裂口彈升540點，開市報18956點。到依家9點37分，恒指一度升逾600點，不過，喺五分鐘圖上見到指數喺開市後再上行，就遇到500分鐘線(五分鐘圖100線)，其實喺完U之後見小時圖，指數嗰擺位都放咗喺10小時線(小時圖10線)以下位置。
嚟到依家9點43分，恒指升跌進一步收窄至升400幾點，指數的確出現高開低走嘅情況，而小時圖上亦見到10小時圖阻力唔細，出恒指熊博恒指今日見彈散市都未嘗不可，但係一開見到堆恒指熊時，係有新熊上市，但收回價都仲喺處於20300至20399點呢層街貨，同現價有逾1800點距離，所以槓桿都得番8倍幾係最高，仲要避開高街貨喎。恒指熊(57602)，收回價20312點，同現價有逾18690點，8.37倍槓桿已經就住啲細街貨嚟揀架啦，趁依家五分鐘圖見指數受制500分鐘後回落至開始接近250分鐘線(五分鐘圖50線)，一旦呢個位都穿埋，同時Slow STC(14,3)兩線確認高位回落，咁(57602)可以偷位出場。
身邊都開始有朋友同家人中咗新冠，還好今日生日嘅舅父噚日快測終於都呈陰性，Check埋今日兩連陰的話，就可以出監啦！喺生日好番，都真係一件好事呀！大家都要繼續好好保護自己同身邊嘅人呀！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
