噚日揀咗隻恒指Call(20442)出嚟，喺噚日上半場11點45分至11點50分，趁Slow STC(14,3)落到超賣至嚴重超賣水平之際摺進入場，入場平均價為0.097元。目的都只係博恒指日線圖上見低位「身懷六甲」可以博得到指數出技術反彈(真係唔係博佢翻身，稍稍彈起捉到轉角嗰種感覺真係好爽)
噚晚六合彩唔中，今朝起身同作戰室裡面嘅戰友一齊睇牛熊證街貨圖時，我都真係以為博得中轉勢，事關見到牛熊證街貨圖上熊證最貼價落到去22500至22599點，而牛證最貼價層為22300至22399點，兩者嘅距離終於收窄到得返200點左右，而以恒指噚日收市價計，指數終於見到靠近返上方熊證街貨。
但話分兩頭，以貼價計，牛證街貨量比熊證多；再加上今朝喺作戰室有位戰友話美期無啦啦向下插，一睇，係喎，恒指仲行緊U盤時段，道期跌緊400幾點，嘿...怪不得今朝有戰友同我講話想揸隻恒指界內證一年，問我點睇，呢啲moment揸呢啲有少少槓桿又有少少頭盔嘅Product都真係一個選擇，只係我奇怪在初初大力推廣界內證嗰間發行商，今日用佢網站search嗰時變咗404嘅...
到恒指完U，我個腦都404，跌588點開市，失22000點之餘仲落到21800點呢個位，牛證首五層街貨全數死亡，呢度有相當於2970張期指，又一次輸喺技術分析 VS 街貨手上(都真係唔係第一次)10次有8次都係街貨贏，人類果然係重複犯錯。
以今朝開市後首十分鐘走隻(20442)，按當時高低位做過0.082元/0.075元計，平均走貨價為0.0785元，對比噚日嘅平均買入價，呢趟開市即輸19.07%；我亦無奈地同我家肥貓宣布，嚟緊呢個月無罐罐食啦(反正你都唔吼，開一罐點都要掉半罐先安落，你睇下烏拉克啲貓貓)。
嚟到10點21分，恒指大裂口過後恢復一陣平靜，指數見跌幅有所窄，開始望下隔離左右啲個股係點，阿里(09988)失守紅底股、美團(03690)再跌逾半成，京東(09618)無咗廿蚊，屍橫遍野，今朝喺作戰室好彩都有同大家講出隻美團淡倉，補一補隻恒指好倉，果然捉轉角位難度分媲美四週半跳，冰王子羽生結弦都做唔到，更何況係我？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
