受俄烏局勢醫張所拖累,隔晚美股顯著下跌,不過美國國務卿布林肯接受邀請,下周將與俄羅斯外長拉夫羅夫見面,港股跌勢尚算溫和,恒指跌逾200點後跌幅收殺,暫於10日線(24667)爭持。恒指今早低開159點,跌幅一度擴大至255點,見24537半日低位,見有買盤低位吸納,跌幅一度收窄至29點,見24763半日高位。但周末效應下,沽壓再現,半日仍要跌逾百點收市。恒指中午報收24674,跌117點;國指跌34點,報8677;恒科指跌35點,跌5627點。中午成交額進一步縮水至509.89億元,都預咗周末前夕,市況淡靜。
藍籌股偏軟,友邦(01299)跟大笨象(00005)分別跌1.4%跟0.2%,港交所(00388)半日跌0.5%,創科(00669)半日無啦啦跌4.3%,唔知同供應鏈及運輸問題有冇關係,今日係表現最差藍籌股。至於重磅科網股個別發展,雖然騰訊(00700)同阿里(09988) 被美國政府列入「惡名市場」(notorious markets)名單,指控該兩家公司嘅網站涉及銷售冒牌商品。不過實際上係唔影響營運,所以對兩股影響幾乎係零,股價亦唔見有乜嘢反應。
噚日物管股走弱,今日內房股反而走強,但礙於大市整體氣氛麻麻,內房股升幅又唔算好勁,華潤置地(01109)半日升3.3%,唔單只係最大升幅藍籌股,內房股中亦跑出。內房股似乎已走出谷底,不過經過整整大半年調整,元氣大傷,都需要時間復原,但最壞時間已過,財務狀況較為穩健嘅龍頭,係時候開始收集。
手遊股亦有資金流入,但呢啲股隨時炒一日半日就唔見影,都係睇下算,如果真係想儲啲手遊股,都係網易(09999)呢隻龍頭最穩陣。話咗藥明一系短期難有運行,整個CRO股板塊都唔多精神,高估值係呢個板塊唔掂嘅原因,係息口向上下,資金都唔願意留喺高估值股板塊,估計呢啲股嚟緊一段時間有波幅,冇升幅。
麥狄文
(徐狄怡‧證監會持牌人)