噚日揀咗隻恒指Call(22965)出嚟，本來諗住又會食白果，誰不知噚日上半場臨完場前恒指急落，去到上半場打冷鐘時見到Slow STC(14,3)都已經落到超賣，所以下半場一開市之後就衝隻(22965)入去。都諗住呢一趟快落快上架啦，不過見恒指似乎愈升愈有咗，用返一如以往嘅Swing Trade方法，就係Slow STC(14,3)上返超買時沽好倉，最後喺下半3點5分至3點25分，五分鐘圖Slow STC(14,3)兩線上超買至嚴重超買範圍，喺呢段時間沽走隻(22965)的話，按當時高低位做過0.146元/0.145元計，平均沽貨價為0.1455元，呢趟執雞平均賺幅有6.2%。
今朝睇新聞又話烏俄兩國似又想打仗，搞到恒指今朝跌百幾點開市，喺日線圖上指數失咗條10天線，無所謂，之前三線匯聚散咗啫，但三線分開之後，數落最近嘅20天線就會變成下一個單線支持，換言之恒指目前處於10天同20天線之間，大方向上，指數仍然處於1月初至今嘅「上升通道」之上。
今朝見恒指完U之後，五分鐘圖上Slow STC(14,3)見高位回落，出淡倉追返條Slow STC(14,3)落到超賣都唔錯，到開市後指數一度跌逾200點，本以為方向正確之際，恒指喺五分鐘圖上第一粒燭出長長嘅下影線，都有啲心知不妙，但其後見指數跌幅收窄都上唔返保歷加通道中軸，打算以此為淡倉嘅止蝕位，雖然之後指數再見稍回，但去到依家10點鐘，見指數以「大陽燭」一下子抽升咗上去，第一注出師不利，怪就怪自己今朝明明見到長下影線都唔信邪。「咁反手咪得囉」，真係唔會，因為呢啲情況好易左一巴右一巴，車到自己連信心都輸埋，所以應該冷靜返自己個人，深呼吸，諗清楚啲先再出手。
今日收市之後，恒指服務公司就會公布2021年度第四季恒指成份股檢討結果，根據恒指服務公司之前定好嘅「新恒指成份股組合」，由依家至年中指數要增加至80隻嚟計的話，下次再檢討就係5月，怕且今次恒指成份股都係有增無減，而當中比較大熱門嘅農夫山泉(09633)都已經喺另一地方講咗，當然仲有其他熱門啦。
下晝講。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
