今日2月14日情人節，例牌今日晏晝嘅新聞你應該會見到記者落咗去旺角花墟訪問一下買花嘅市民今年用咗幾多錢買花、賣花嘅老闆今年生意如何，由於無晚市堂食關係，餐廳可能會話會推出情人節午市套餐或者今年生意會有下跌等等，Anyway，記得我細個時老媽會同我講：開心嘅日日都係情人節，唔開心嘅情人節都可以嗌大交。所以最緊要都係開心啫，情人節快樂！
至於今日恒指都好「快落」，開市跌180幾點之後，依家9點49分，指數向下再殺多200點左右，跌緊407點，做緊24499點，二話不說地已經將第一層牛證全數殺死，今朝喺作戰室裡頭完U未正式開市已經捉定出淡倉條路，希望呢一趟不消半小時嘅淡倉注，可以幫補下作戰室裡面嘅男仕今日買花嘅錢。
上個星期講過，恒指日線圖上見到指數受制於150天線，不過，下方亦有10、20及100天線出現三線滙聚，呢個位隨時支持大過150天線嘅阻力。同時指數目前於「上升通道」中，以一浪高於一浪的姿態運行，常言道指數大漲小回式上行，比一口氣直奔更健康，依家恒指就出現呢個咁嘅情況；更何況指數即使失三線滙聚支持，都仲有「上升通道」底線頂住，基本都依家都可以推斷到指數處於大漲小回中嘅小回位。
但問題就係指數倒底會去到三線匯聚之就停，還是仲有得落，去到「上升通道」底線先識得停。依家10點8分，指數似見有停定回升嘅走勢，但小時圖上見保歷加通道則繼續收窄，制限住大市運行空間。坦白講以恒指現價(10點9分報24571點)計，指數靠近牛證街貨層之餘，其實就算指數落到三線滙聚位，現價同呢個位都仲有百幾點嘅空間，出隻高少少槓桿嘅熊食咗佢都仲可以。
恒指熊(51670)，收回價25000點，同現價有約500點差距，約34倍槓桿都夠DT用，見五分鐘圖指數稍稍回升之後企喺度無再上，彷彿等緊條50分鐘線(五分鐘圖10線)嚟擋路咁款，進取嘅以指數受50分鐘線阻力而小注進場，因為都係博多百零點架咋。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
