噚日收咗市之後一支箭咁撲出門口，事關約咗師兄老劉劉兆昌去佢地頭搵佢食Tea(兩條友隻半隻雞再加堆薯條，咁算唔算Tea呀)，好彩我哋兩個算住得近，就算之後僅限兩人一檯我哋都仲可以搵到時間見下面，到之後疫情有緩和的話，先至再約埋我舊老細焚爺同Big Man Clarence四人飯聚啦。
噚日揀咗隻恒指Call(16656)出嚟，原因係見恒指牛熊證街貨圖上，指數仍然靠近熊證嘅同時，熊證街貨又比牛證多，所以就等恒指五分鐘圖Slow STC(14,3)落返去超賣水平先至小注落場。不過，呢個情況只係朝早見過，成個下半場都未見過Slow STC(14,3)落返去超賣位，所以隻(16656)全日都只係坐喺後備席。
依家9點53分，恒指開市後見走勢明顯再向下，到依家指數跌緊141點，做緊24438點，喺五分鐘圖上見指數行咗個細細嘅「三角形」出嚟之後有向下突破嘅情況，但咁啱又有條750分鐘線(五分鐘圖150線)喺度作勢做支持，所以喺作戰室上面都同大家講，安全嘅話可以再等埋指數失守條750分鐘線就出淡倉。喺作戰室裡面大家唔止好單純地講市，基本上天南地北，乜都講餐飽，呢期hot topic就更係偉大嘅COVID-19啦，今日預咗佢過千宗確診，所以如果要張竹君逐個逐個咁講佢哋有無打針、喺邊度中、去過邊，我諗個疫情記者會由4點半講到12點半都未講完。正當大家討論「梁子超料兩周後單日病例將破萬，疫情將全面失控」之際，恒指已經二話不說喺五分鐘圖上失750分鐘線。
作戰室叫咗兩次話出淡倉，依家10點13分我估有睇到message嘅都已經出咗，同時已經Mark定以小時圖100小時線(小時圖100線)為第一個下望目標。恒指熊(62930)，收回價24900點，同現價有逾450點差距，約41倍槓桿都夠DT用，當然都可以用小時圖100小時線做目標啦，只係依家10點18分見恒指五分鐘圖上不論指數同Slow STC(14,3)都已經落到相對低嘅位置，可以稍等指數同Slow STC(14,3)會唔會稍為彈高少少先至吼位出場，例如見指數上破唔到保歷加通道中軸咁囉。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
