今日大年初四，亦都係虎年第一個交易日，我同我家老爺+肥貓祝大家虎年行大運！記得以前聽過一個大我四年嘅同事講：細個時會祝人哋搵多啲、賺多啲；到大個之後就會祝人哋身體健康！百毒不侵！其實...Why not both？除咗買乜中乜之外，或者大家都希望今年可以無憂無慮(過去香港人實在要煩太多嘢啦)。
星期一(1月31日)半日市，當日恒指走勢有啲虎頭蛇尾，事關最後15分鐘，恒指五分鐘圖上見指數喺高位連出三支陰燭，「三飛烏鴉」亦因而成形，收市嗰一下仲穿埋條保歷加通道中軸。而噚晚美股又表現得曳，其中Meta更加大裂口跌成26.39%，本身拎住隻恒指Call(18800)用嚟小注過新年博今日開紅盤攞嗰意頭，唔呃你，真係有啲驚驚。
去到9點20分，恒指完U後開市報升590點，我都忍唔住喺屋企「嘩！」咗一聲，開市報24392點，呢口價將指數打返上熊證街貨嗰邊，仲要將第一層熊證街貨24200至24299點全數收回，呢度有相當於600幾張期指。至於作戰室裡頭就梗係割禾青先啦！為自己虎年第一擊攞個頭彩先嘛！以星期一另一處出文時間10點1分起計至上半場12點鐘收市，(18800)高低位做過0.14元/0.125元，平均買入價為0.1325元。至今朝未搭正9點半已經叫定過年好倉攞紅盤好準備開市走貨，所以以正式開市後10分鐘計，(18800)高低位做過0.16元/0.152元計，平均沽貨價為0.156元，呢注頭彩平均賺幅有逾17%。恭喜恭喜！
另一方面，明白恒指彈到咁高實會行高開低走，所以同步都喺作戰室同大家講即市第一注以淡倉為主，不過呢注即市淡倉應該開到喺五分鐘圖上見到指數喺天線上有支持就應該走人，事關今朝恒指大裂口高開之後，指數由企喺牛熊證街中間位，變成靠近上方熊證街貨層，就算依家9點56分，恒指升幅收窄至升381點，做緊24183點，但點數指仍然都係靠近熊證街貨層。
恒指牛(68324)，收回價23858點，同現價只爭355點左右嘅差距，好鬼貼價架，進取嘅喺五分鐘圖上如果見到指數踩住100分鐘線(五分鐘圖20線)有力向上；或者安全嘅等Slow STC(14,3)出觸底反彈後先至進入亦可。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
