隔晚美股大現過山車，三大指數早段跌到阿媽到唔認得，俗稱恐慌指數嘅VIX指數，更升至38水平，其後VIX升幅收窄，去返30，三大指數倒升收場，但今明兩晚聯儲局議息，預期美股會繼續波動，美股缸邊友最好綁緊啲條安全帶。俄烏戰爭一觸即發，資金傾向避險而逃離股市，亞太區股市今早下跌，港股噚日回咗309點後，今日意猶未盡，半日再跌逾300點，10天線(24452)跟100天線(24578)雙雙失守。
恒指低開404點，報24251，甫開市已失10天及100天線，其後跌幅曾擴至530點，見24126半日低位，之後跌幅收窄，喺24300附近爭持。恒指半日收報24351，跌305點；國指收報8569，跌88點，恒科指半日收5604，跌99點。
藍籌股幾乎全軍覆沒，只有體品孖寶逆市造好，李寧(02331)與安踏(02020)半日分別升1.8%和1.6%，係表現最好嘅兩隻藍籌股。至於大笨象(00005)半日跌2.1%，識得喺55元大阻力位前put大笨象嘅缸邊友，都係時候食糊套現。友邦(01299)半日跌3%，暫時支持位上移至85，睇吓能否通過考驗，守住呢個支持位。
隔晚美國科網股先跌後回升，但香港呢邊嘅科網股就繼續回吐，ATMXJ全線下跌，但騰訊(00700)守得返460元，美團(03690)守住220，京東(09618)守住280支持位，都算係咁，反而阿里(09988)失守120，小米(01810)企唔到18，佢哋表現較令人失望。其他科技股普遍偏軟，唯獨噚日跌得較急嘅網易(09999)逆市升0.7%，150元有一定支持。
生科股今日沽壓嚴重，龍頭藥明生物(02269)半日跌2.2%，其他板塊內股份跌幅更大，其中歌禮(01672)、加科思(01167)跟永泰生物(06978)半日跌逾8%，只有信達(01801)有報告唱好，半日逆市向上。
雖然俄烏或開戰，但油價不升反跌，進一步回落，隔晚紐約期油跟布蘭特期油分別跌2.2%跟1.8%，航空股逆市造好，其實喺全球大部份國家開始選擇與病毒共存下，航空業有機會喺下半年慢慢重回正軌。只不過內地跟香港則繼續採取清零政策，要全面開放關口，可能遲人一步，咁中港兩地嘅航空股仲值唔值得追入，真係見仁見智。
臨近歲晚，內地例牌水緊，北水對於港股嘅支持，嚟緊幾日只會買少見少，咁嘅情況下，港股仲守得住喺24000之上，已經要劏雞還神。不過阿Man一向係大好友，對於目前已到蔗渣價估值嘅港股，後市又唔係睇得太差，暫時喺24000至25000之間上落整固吓先，或者到虎年可以扭轉乾坤，下半年港股有機會起死回生。
麥狄文
(徐狄怡‧證監會持牌人)
