噚日恒指似乎未能廷續前日(1月12日)升勢，無他嘅，喺日線圖上面都見到指數上破到50天線，但100天線似有阻力，同步Slow STC(14,3)兩線都有遇頂回落嘅走勢，今日恒指開市跌200幾點亦屬「預期之內」，如果唔係噚晚都唔會喺電台度話對個市再升呢單嘢有啲驚驚地啦。
與此同時，噚日恒指收市後再完埋個U盤，見到指數明明係跌9點，但最終倒升27點收市，喺五分鐘圖上見到除咗見到棍陽燭之外，Slow STC(14,3)兩線亦上到90以上嘅嚴重超買水平，指數低開雖然之後或會高走，但今日低開之後Slow STC(14,3)都唔係跟落得好多，只係見到%K線剛剛開始喺高位向下穿過%D線，所以都有開市時話可以出淡倉先追一注，但可惜今日第一粒燭出完條長下影線之後就低開高走咁款，技術上，雖然喺750分鐘線(五分鐘圖150分鐘線)仍然成為指數阻力，但問題係呢條線呈上中；都算，嚟到依家10點4分，指數跌幅收窄至跌151點，喺五分鐘圖上指數同50分鐘線(五分鐘圖10線)終於都相遇啦！認真，如果指數上返50分鐘線以上的話，都怕指數低開高走格局成形，所以喺作戰室都講定一上破就好閃人。
「社交距離 殺到年初三」戰友忽然提出，望望電腦右上角個時間同日期，係喎，今日星期五喎，除咗Happy Friday之外，今日好似係林鄭出嚟講新一輪抗疫基金喎，咁林鄭出嚟嘅話，咪可以守多陣？
睇完強少開心Share比我嘅Message之後，見返五分鐘圖上恒指終於有條線可以擋得下路，就係條100分鐘線(五分鐘圖20線)，Slow STC(14,3)都喺中軸位見有再次下行嘅情況，坦白講，莫講過依家嘅五分鐘圖，就算係日線圖其實都值得去開返淡倉，博返指數向下回落返去50天線先。
以收回價企得後過24600至24699點過千張期指重貨熊以上嘅熊證為第一個揀證嘅條件，恒指熊(55137)，收回價24700點，，約39倍槓槓，唔博日線都夠Day Trade用，趁依家指數受制於100分鐘線以下，即出的話快炒博保歷加通道見底線或者Slow STC(14,3)落返超賣就算；miss咗唔緊要，以一貫方式，等返Slow STC(14,3)上到超買時落咪得囉。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
