話咁快聖誕節假期咁又過咗，不過25號正日同26號Boxing Day咁啱踩住星期六日，難免有一種「蝕假」嘅感覺；嚟緊嘅元旦日(1月1日)都係星期六，又要蝕多鋪比佢，無辦法啦，未望2022年嘅公假係點，不過應該啲請假略攻已經出晒，希望可以駁到自製長假期，無得外遊喺屋企抖下都好呀。
呢幾日嘅天氣真係特別凍，已經為我家肥貓做好保暖措施，不過佢本身毛絨絨都已經好保溫，入屋將近五個月佢終於再得到佢更多嘅信任，願意瞓喺我隻手上面，佢真係好鬼暖。
今日恒指似乎都回暖咗少少，開市升58點，開市報23282點。不過，到依家9點45分，指數已經轉燈出高開低走，喺五分鐘圖上見Slow STC(14,3)兩線向住超賣方向出發，但基於今朝指數開市幅度點數唔高，所以目前下行到接近保歷加通道底線，吼呢啲位出淡倉博Slow STC(14,3)再向下落的話，就要留意保歷加通道口有無拓闊比位指數再向下行。
既然指數又慢活，不如睇下牛熊證街貨圖有無提示。今日見牛熊兩邊都無新增街貨，牛證最貼價層為23000至23099點，都係啲大點數齊正位，呢度嘅街貨量唔多，得48張期指街貨，但問題就在於要殺呢層牛證街貨的話，指數要失23000點呢個齊整點數位。至於熊證第一層為23300至23399點，呢度都只係得35張期指，怕且指數都可機會博近牛熊兩邊街貨再儲多啲先至食。
嚟到9點59分，指數終於都見高開低走嘅方向，聊天室裡頭都開淡倉，留意嘅只係五分鐘圖上嘅保歷加通道口有無繼續拓闊，比位指數再向下落，仲有轉晒燈。由日線圖見指數今日被條10天線穿住，走勢形態向下中，Slow STC(14,3)兩線喺接近30呢個位有作勢向下回落嘅情況，唔通23000點守唔到今年？
恒指熊(60628)，收回價23528點，同現價有近400點差距，所以有成42倍槓桿咁高，時近年尾，今個星期又只係得3.5個交易日，有咩事DT即閃都好嘛。一如以往，吼五分鐘圖Slow STC(14,3)見超買時落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入Patreon/聊天室？Click呢度就得：https://www.patreon.com/cbbcwar
FB：https://www.facebook.com/cbbcwar
