美國發現本土首宗變種病毒Omicron個案，但變種病毒殺傷力都唔夠鮑爺一句勁，鮑爺重申對收水持開放態度，市場最驚係收水，結果美股隔晚先升後回，三大指數仲要插到全日低位收市。好彩係道指期貨喺亞洲時段彈返二百幾點，令港股半日有得彈，暫時恒指喺23700水平爭持。
恒指低開134點報23524，一度跌141點，見23517半日低位，但23500似乎有不俗支持，買盤再現，大市止跌回升，最多升148點，見23807半日高位。可惜23800水平企唔穩，隨後升幅縮水，更一度升勢不保倒跌。半日恒指收報23714，升55點；國指升41點，報8467；恒科指跑輸大市，中午報收5973，跌85點，應該都係受阿里(09988)拖累。大市半日成交861.93億元，超過800億都叫多咗少少，即係呢啲位已有資金肯入場買吓嘢。
藍籌股中，阿里都算樣衰，今日又創上市新低120.1元，走勢上仍向下尋底，120元都唔可以叫支持位。鮑爺堅持有機會提早收水，令息口趨升，金融股造好，內銀同本地銀行股都有進帳，連帶保險股亦有理想表現。至於港交所(00388)呢期勢弱，長期成交低迷，唔少缸邊友更揚言要放棄港股，令港交所走勢每況愈下。濠賭股各自發展，銀娛(00027)半日靠穩，但金沙中國(01928)再跌1.6%，睇嚟濠賭股仍然波動，因為周焯華事件陰霾未散。
蘋果公司向iPhone零件供應商稱，iPhone 13系列產品需求已經減弱，蘋概股整體向下，相關股份全線下跌，就連近日具有元宇宙概念嘅舜宇(02382)亦難逃一跌，半日跌3.3%。其他相關股份跌幅由0.7%至超過6%不等。科網股當然係阿里最差，但其他股份唔見得好得去邊，只有騰訊(00700)跟美團(03690)半日有得升。阿Man講過要博科網股反彈，龍頭騰訊跟美團係不二之選，事實亦證明大市跌定，都係佢哋彈得快手啲。
今日內房股亦見反彈，其實呢個板塊估值已經相對便宜，只係債務問題呢個計時炸彈未拆，市場難以安心，就算反彈亦未必玩得耐，至於有心收集中長線嘅，要揀潤地(01109)跟龍湖(00960)呢啲財政實力較雄厚，以及有央企背景嘅一線房企，二三線內房股雖然彈嘅幅度大啲，但一回頭，跌得急又係佢哋。
麥狄文
(徐狄怡‧證監會持牌人)
