美股個別發展，喺債息趨升下，高增長股捱沽，納指跌，更創今個月11日以嚟嘅低位；道指跟標指升。至於港股連跌五個交易日，唔見過千點後，今日好淡爭持，暫時守住24500水平。恒指高開20點，最多升64點，見24716點半日高位，其後回落，但最多都係跌93點，見24557點兩星期低位。中午恒指報收24635點，跌15點；國指跌54點，報8773點；恒科指跌35點，報6287點。
藍籌股各走各路，海底撈(06862)講咗N咁多次愈撈愈底，仲要係深不見底，半日跌5.6%，又創17.82元上市後新低，阿Man之前都提咗好多次，便宜莫貪，亦唔好自作聰明去撈底，因為永遠你都唔會知個底喺邊度。吉利(00175)半日跌4%，又落返去26至28密集區樓下，守到250日線24.5仲還好，又失守嘅話，要見22先有支持。不過息率趨升，金融股造好，友邦(01299)跟大笨象(00005)半日分別升3.8%及1.3%，不過留意友邦90元阻力大，而大笨象呢，48元阻力亦難撞穿牆。
科網股亦個別發展，快手(01024)雖然仲未有錢賺，但季績好過預期，股價半日升7%，只係紅底股身份難維持，都唔好抱咁大期望。至於仲有錢賺嘅小米(01810)呢就變咗西米咁款，股價半日跌7%，見咗一年半低位，廿皮強大支持都失守，都咪話唔大鑊。雖然小米業績仍有增長，但毫無驚喜市場唔buy，瑞銀仲出咗報告話對中國智能手機市場需求睇得較為負面，唔單止小米跌跌不休，連其他手機設備股半日亦腳軟。
內房股爆煲沒完沒了，花樣年(01777)債務違約已發生，奇怪係「20花樣01」債券持有人會議未通過啟動司法程序議案，竟然手下留情，半日股價彈咗12.5%。不過債務問題纏繞下，其他內房股普遍腳軟，之前有大行報告講咗，內房股嘅問題唔係一時三刻可以解決，呢個板塊短期都難有起色。都係嗰句，便宜莫貪，喺內房股債務問題仍未明朗前，呢個板塊都係避之則吉。
麥狄文
(徐狄怡‧證監會持牌人)
