市場已消化高於預期嘅通脹數據，美股上周五晚回復強勢，三大指數上升，道指升179點；標指跟納指分別升33點及156點。不過港股就高開低走，主要係A股受壓，拖累港股由升轉跌。恒指高開110點，開市最多升155點，見25483點半日高位，重返20日線(25427)，但20日線得而復失，其後倒跌最多90點，見25230點半日低位，但50日線(25218)有支持，半日跌幅收窄。恒指中午報收25307點，跌20點；國指則跌59點，報收9055點；恒生科指則半日升43點，報6600點。
藍籌股個別發展，騰訊(00700)業績表現平平，有大行調低其目標價，不過集團表明要向元宇宙發展，大行繼續睇好其前景，半日升1.8%，留意500元阻力唔細，有貨短炒要睇住食糊。美團(03690)跟阿里(09988)半日則跌0.4%及1.1%，阿里又回落至160元呢啲支持位，希望守得住。友邦(01299)半日彈2.3%，但平保(02318)則跌2.5%。至於比亞迪(01211)維持上落格局，暫未能向上突破，半日跌2.7%，暫時喺290至300元之間整固。藥明生物(02269)半日彈2.6%，留意110元有阻力。
中國10月份工業增加值、零售增速勝預期，固定資產投資增速則略遜預期。而內地上月70個大中城市新建商品住宅價格指數按月則下跌0.2%，加上融創中國(01918)配股減持融創服務(01516)，股價半日分別跌9.3%和13.6%。反映內房股仍然缺水，甚至有機會出現內房配股集資潮。內房股今日全線下跌，跌幅由2.4%至超過7%不等。阿Man多次提醒暫時勿沾手內房股，即使有一兩日反彈，可能都係為咗抬高股價配股而鋪路，暫時內房股仍唔值博。
至於出行股今日再落鑊，不過呢啲反覆市況，升咗就唔好多手追，一追貨好易又坐舨艇，都係眼看手勿動。康希諾生物(06185) 疫苗「克威莎」在阿根廷獲推薦作為加強接種和額外接種的異源疫苗，一度刺激股價盤中升近一成，但半日升幅收窄至3.6%，又係另一個高追好易瀨嘢嘅例子。
暫時大市無乜方向，市場等緊中美元首「習拜會」會有乜嘢消息，估計今次雙方會談未必有實質結果，華府對中國高科技行業施加的限制可能會維持，但有機會朝降低部分關稅邁進，呢個可能對後市氣氛有啲正面影響。反而內房股嘅債務問題，係港股一大絆腳石，呢個問題唔解決，都會拖死港股後腿。
麥狄文
(徐狄怡‧證監會持牌人)
