雖然美國債息創五月高位，但道指隔晚再創盤中新高，而標指跟納指則個別發展，標指升，納指略回。而於港股今早較為反覆，畢竟連升四個交易日，恒指升逾千點後，要抖氣亦好正常，不過暫時仍守於二萬六之上，反映港股市底已轉強。
恒指略為高開5點後，表現反覆，一度跌115點，見26020點半日低位，但26000關見支持，曾倒升93點，見26229半日高位，亦係自9月8日以嚟最高點。不過始終喺成交未見顯著增加下，恒指收復咗50日線(25390)，市底轉強都好，仍難見牛氣再現，暫時缸邊友都係較為審慎，步步為營，而阿Man亦主張以短炒為主，打游擊嘅策略，令市況仍反覆。中午恒指報收26060點，跌75跌；國指報收9301點，升25點；恒科指則跌45點，報6646點。
藍籌股普遍抖抖，呢兩日友邦(01299)接力大笨象(00005)做好，但90元水平未能企穩，半日再跌1.5%；反而大笨象今日逆市升0.8%，兩股近日走勢此起彼落。過去第四季為IPO旺季，唔少企業都趕搭年度上市尾班車，但今年情況有異，呢排上市消息靜過鬼，大型IPO缺席，連規模較細嘅IPO亦無影，加上內地京交所計劃趕快啟動，港交所(00388)呢期無乜運行，雖然都有跟住大市反彈，但相對科網股表現差咗幾條街，500元阻力影都唔，半日跌1.5%，連490元亦企唔穩。至於信義光能(00968)半日跌4.1%，藍籌股中跑第尾；同系信義玻璃(00868)半日跌2.4%，一對信義孖寶雖有隨大市反彈，但暫時仍未見扭轉弱勢，跑贏大市。
內險股今日表現較為搶鏡，平保(02318)旗下平安銀行第三季多賺近33%，之前衰咗咁耐，今日終吐氣揚眉，半日升7.3%成為最佳表現藍籌股。其他內險股普遍向上，升幅由1.6%至3.2%不等。
恒大(03333)出售旗下恒大物業(06666)控股權交易告吹，恒大一對孖寶今日復牌，已買家合生創展(00754)亦復牌。對於交易告吹原因出咗兩個版本，買賣雙方各執一詞，演變為羅生門事件。交易唔成事嘅真正原因係點，已唔值得考究，反而恒大出售資產接連觸礁，除咗今次賣唔成恒大物業控股權外，之前出售本港恒大中心亦被準買家越秀(00123)放飛機，總之恒大就係見財化水，原來呢兩項交易可以套現返幾百億，有助緩解財務壓力，但家陣搞唔掂，睇嚟又向住清盤之路邁前一步。恒大復牐後當然插水，恒大跌一成，恒大物業跌逾6%，連帶同系恒大汽車(00708)亦插水一成。
對於恒大債務問題，好明顯睇到阿爺取態係你死你事，尤其阿爺認為只要確保恒大事件唔會演變為火燒連環船，恒大違約無錢還嘅苦果，只有由恒大債權人自己承受返。阿爺向市場再派內房產業定心丸，國務院副總理劉鶴稱，目前房地產市場風險整體可控，內房股今日逆市向上，放棄收購恒大物業嘅合生創展，半日亦跌5.1%。除咗內房股錄得2%至8%不等升幅外，物管股亦跟隊炒上，升幅由3.8%至一成不等。
麥狄文
(徐狄怡‧證監會持牌人)
