美國隔晩表現反覆，先跌後回升，有消息指喺美國總統拜登施壓後，參議院共和黨領袖將允許緊急債務上限延長至12月，以避免美國政府在本月18日出現債務違約。喺美國債務危機緩解下，美股回升，利好市場氣氛，帶動港股反彈。恒指喺噚日創一年低位後，今日一度反彈逾600點。
恒指低開372點，成功收復10日線(24329)，雖然升幅曾收窄至313點，見24310點半日低位，但10日線再現支持，升幅其後擴闊，最多曾升624點，見24591點半日高位。恒指中午報收24543點，升576點；國指則升242點，報8654點；恒科指升幅達4.3%，半日升251點，重上6000水平，報收6117點。
藍籌股大多造好，尤其科網股表現突出，主要係隔晩美國10年期國債孳息回落，紓緩科網股沽壓。ATMX終於四大天王齊齊向上，騰訊(00700)升3.5%；小米(01810)5G手機喺中東歐地區市佔率冧巴溫，半日亦彈3.8%；阿里(09988)獲股神拍檔芒格大手增持，半日升5.5%；美團(03690)最勁，半日升7.6%，係最大升幅藍籌股。
暫時騰訊逼近50天線466.3，呢個會係一個阻力位；而美團重返20天線243.1，要留意企唔企得穩；阿里則重上10天線，但距20天線150元仍有段路；小米則叫守咗20元支持，但22阻力未必咁易上得返。總括嚟講，四大天王暫時只能視作反彈，仲未講得上係轉勢。其他科網股普遍反彈3%至8%，不過目前呢啲咁反覆嘅市況，見彈係把握減磅同逃生機會，而唔係再追貨，個市一日未轉勢，反彈嗰日一追貨，小心又坐艇。
其他重磅股大笨象滙控(00005)同友邦(01299)半日分別升2.6%及0.8%，內銀股亦見回升，港交所(00388)半日彈1.1%；平保(02318)之前跌得急，今日彈返多少少，半日反彈5%。本地地產股亦有唔錯表現，噚日《施政報告》提到房屋部份，大摩就話未來五年供應未見大幅增加，亦未見有樓市冷卻措施，對地主佬嚟講係好事，地產股今日普遍反彈。
不過，花旗報告就無咁樂觀，對《施政報告》政策睇法中性，亦維持樓價喺第三季見頂睇法；仲表示短期地產股嘅發展商或上升，但若然立法會跟行政長官選舉後，政府潛在強硬立場，或致潛在政策風險進一步升溫，所以認為收租股穩陣過發展商。阿Man嘅睇法較為傾向花旗報告，話晒阿爺講咗「房住不炒」，而地主佬暴利時代結束，反而疫情緩和有助刺激零售市道，對收租佬嚟講係好事。
話咗石油股難炒，油價一回，相關股份即插水，三桶油除咗中石化(00386)跌0.2%較溫和之外，中海油(00883)跟中石油(00857)齊齊跌逾3%，其他油服務股跌2%至8%不等。今日登場新丁譚仔(02217)，半日收3.12元，低招股價6.3%，話咗市況唔好，新股唔會有運行，抽到都要喊三聲。
麥狄文
(徐狄怡‧證監會持牌人)
