美股隔晚反彈,可惜港股跟唔上美股步伐,其實港股一直唔跟美股行已好一段時間,缸邊友唔會覺得驚訝。中港股市先高後低,恒指四連跌,半日再跌近500點。恒指高開8點,最多升12點,見25045點半日高,可惜開市無耐已見沽壓湧現,半日一度跌508點,見24525點半日低位,更創自去年11月2日以來新低。恒指中午報24538點,跌494點;國企指數報8746點,跌189點;恒科指半日跌106點,半日報收6191點。恒指再失二萬五,今次仲要穿埋7月及8月兩個前底,都咪話唔濕滯。
藍籌股只有內需股靠穩,百威亞太(01876)、恒安(01044)跟蒙牛(02319)逆市升,其他藍籌股幾乎無一倖免,ATMX繼續走弱,阿里巴巴(09988)更見本港上市後新低,半日跌2.5%。港交所(00388)呢幾日跌浪之中算係硬淨,但今日撐唔住,半日都要跌2.8%,而信義光能(00968)跟吉利(00175)半日齊跌逾半成,比亞迪(01211)半日亦跌3%。
不過跌得最慘烈嘅係內房股,而物管股亦被拖累。恒大(03333)債務危機仍未解決,標普把恒大評級由CCC調低至CC,評級展望仍為負面,認為恒大未能償債風險極高,最終可能導致債務重組,即係等於恒大債務違約幾乎已成定局。市場擔心恒大債務危機或出現火燒連環船狀況,內房股跌勢顯著,物管股亦閒閒地跌6%甚至一成以上。恒大系繼續受壓,恒大半日跌至11年低位,半日跌8.5%;恒大物業(06666)亦創上市新低,半日跌8.5%;恒大汽車(00708)最傷,半日跌16.8%;恒騰(00136)半日跌5.3%。阿Man已講咗幾日,恒大系幾可肯定失救,千祈咪多手接飛刀。
同樣地,阿Man講咗咪多手接飛刀嘅另一板塊係濠賭股,今日除咗美高梅中國(02282)跟銀娛(00027)半日止跌反彈之外,其他濠賭股繼續受壓,外資金沙中國(01928)跟永利澳門(01128)半日再跌6.7%及半成,睇嚟有關澳門就博彩法修改啟動公眾諮詢開始,牌照續期過程需時較長,涉及多個步驟,但市場對諮詢文件感到意外,反應負面,濠賭股嚟緊一段時間都有得震,冇得瞓。
麥狄文
(徐狄怡‧證監會持牌人)