內地近日公布嘅經濟數據都顯示，經濟增長持續放緩，今早公布嘅財新8月服務業PMI創16個月低，A股整體受壓，港股四連升後，今日適逢周末前夕，點都有人減吓磅，今日終見回吐，二萬六關得而復失。恒指低開67點報26022，內地數據公布後愈跌愈急，26000失守，最多跌278點，見25811半日低位，但20日線(25863點)守得住，跌幅曾縮至37點，見26052點半日高立。不過，臨近午市跌勢再度擴大，二萬六得而復失，恒指中午收報25948點，跌142點；國指收報9298，跌42點；恒科指報收6734，跌66點。
藍籌股個別發展，今日科網股回吐，拖低大市，ATMX四大天王，只有小米(01810)逆市靠穩，半日升0.6%，但ATM則齊齊下跌，騰訊(00700)跌1.3%算溫和，美團(03690)跟阿里(09988)半日跌逾3%。作為掀起內地監管風暴嘅風眼股阿里，自從去年10月螞蟻集團上市計劃埋門一腳泡湯後，內地科網企業受到不同形式監管，行業整改沒完沒了。最近阿爺提出共同富裕理念，各大大小小科企更乖乖課金，搞公益回饋社會，響應阿爺嘅共富理念。而阿里剛公布將由依家至2025年，再擲1000億人仔共襄善舉，今次呢筆數佔咗上一季收入近五成，都咪話唔大手筆。內地企業為保平安，乖乖課金係唯一出路，不過賺賺埋埋要拎咁多出嚟共富，對於股東嚟講，當然並非好事。最重要係課金唔等於監管風暴完結，至怕係課金上繳變為習慣，咁科網股真係唔賺錢死，賺錢仲要死快啲。
國家領導人表示將於北京設立證券交易所，主要為中小企集資確立渠道，完善創科板改革，對券商嚟講喺好事，多個交易所機會做多咗生意，內地券商股落鑊。不過內地券商股炒作出咗名短癮，隨時一日半日又無影，加上今日仲要係星期五，無謂跟風追入，高追好易又坐艇。新能源跟電力股繼續做好，大行唱好，中外資大行報告齊發功，吸引資金擁入，不過電力股嘅擁擠交易過後，隨時又回吐，就算電力股大翻身，估值獲重評，都係吼回吐上車穩陣。
麥狄文
(徐狄怡‧證監會持牌人)
