美國公布就業數據較預期遜色，市場解讀為聯儲局唔急於收水，雖然唔少聯儲局官員認為可以開始減少買債，但似乎加息就未有咁快開始。美股個別發展，納指再創新高，道指則略為回吐。至於港股則連升三日，今日先升後回吐，但半日市仍錄得升幅。
恒指高開175點，之後反覆走高，半日最多升331點，見26359點半日高位，創8月16日以來新高。不過高位見回吐壓力，恒指曾倒跌37點，見25990點半日低位。恒指中午收報26047點，升幅縮水到得返19點；國企指數報9322點，升51點；恒科指則升89點，報收6782點。半日成交額增至過千億元，個市總算熱鬧返啲，氣氛續有改善。
藍籌股個別發展，友邦(01299)除淨但半日跌0.6%，加埋之前咁由98水平跌咗落嚟，如果高位買咗貨收埋息都要輸價。大笨象(00005)半日跌1.3%，股價浮浮沉沉，仲係喺45元樓下徘徊。海底撈(06862)都算樣衰，噚日狂嗰一陣，今日又跌返5%，35元阻力大。石藥(01093)跟安踏(02020)逆市跌2.7%，安踏繼續整固，吼位155樓下上車。
科網股今日再彈，不過ATMX四大天王喺阻力位前回吐，升幅收窄，之前有撈貨博反彈要趁機會減倉，始終市況仍反覆，個市上到嚟二萬六水平，都唔會順風順水。快手(01024)落足十八層地獄後，終於搵到個底，加上今日起納入「港股通」，股價半日升6.3%，不過遇到層層蟹貨，要重返紅底股談何容易，留意有貨喺手睇住77元，再穿落去真係麻麻。其他科網股普遍反彈，都係嗰句，唔少股份已升抵阻力位並回吐，有貨應該食糊，無貨唔好追。
電力股維持強勢，唞一唞氣又嚟料，最勁係金風(02208)，半日急升15.2%；東方電氣(01072)中標廣東大唐惠州項目，半日升12.1%；其他電力閒閒地升4%以上，呢個板塊強勢持續，睇嚟要逢回吐吸納。除咗電力股，阿Man留意緊啲基建相關嘅股份，除咗重型機械股濰柴動力(02338)之外，華潤水泥(01313)都係現價可以收集嘅股份。
麥狄文
(徐狄怡‧證監會持牌人)
