變種病毒全球肆虐下，市場再擔心唔再係通脹而係滯漲，美國長債息急跌，反映市場擔心經濟前景，由於變種病動存在太多變數，股市加劇震盪，反映市場對病毒影響經濟嘅悲觀預期。而美股周一急跌後隔晚反彈，美股變得更為動盪，令投資者更無所適從。以目前形勢推斷，變種病毒疫情有兩種發展可能，一係染疫人數雖多，但重症及死亡率低；二係染疫人數與重症關連度高。發展如屬前者，全球政府尚可應對，只要加快疫苗接種速度，再適量放水，經濟仍可穩定復甦；若然情況屬後者，咁就各國都束手無策，皆因咁嘅情況下，即反映疫苗接種亦未能阻止染疫者變重症，除衝擊醫療系統外，或需要實施更嚴厲嘅防疫措施，再有機會令經濟停擺。咁嘅情況下，本來貨幣政策已寬鬆，而經濟復甦緩慢下，出現滯漲機會將變高，咁就真係冚包散。
美股隔晚彈得唔錯，但港股就先高後低，反彈乏力，恒指高開79點後，最多只係升112點，見27371點半日高位，27400連尾燈都見唔到，反彈無以為繼，半日最多跌288點，低見26971點半日低位，27000失守。不過內地股市靠穩向上，港股低位亦見趁低吸納買盤，27000點失而復得。半日恒指跌100點，報收27159點；國指則跌48點，報收9816點；恒科技跌13點，報收7324點。
股市整體氣氛轉弱，除咗市場憂慮變種病毒擴散，拖累全球經濟復甦步伐外，內地對科企監管加強力度，大型科網股濕滯；美長債息急跌，令銀行股息差壓力增加；無論增長股抑或傳統股都無運行，兩類股份都係恒指權重股，咁港股梗係易跌難升彈唔起。暫時恒指由上月高位29400點已反覆向下至接近保力加通道底部26800點，希望BB底有支持，否則失守呢個通道底部，26000點可能係最低消費。雖然指數表現強差人意，但炒股唔炒市下，仍有個別股份有炒作，缸邊友雖難搵食，但未至於死到直一直。
好似之前阿Man推介嘅長城汽車(02333)公布中期業績快報料按年多賺2.05倍，股價半日升近15%，升至超過半年高位。其他新能源車相關股份亦做好，具大一定獨特性嘅贛鋒鋰業(01772) 急升11.6%創新高。
光伏股亦有資金追捧，福萊特玻璃(06865)創五個月高，半日升1.3%，而細細粒嘅中國玻璃(03300)連升多日，不過阿Man對呢啲股有戒心，市值細易受人為操控，與其追逐呢啲股份，都係揀返大隻重磅股信義玻璃(00868)更有信心，每手股數減至1000，入場費平咗，短期有機會挑戰34元再創新高。
麥狄文
(徐狄怡‧證監會持牌人)
