阿爺連環出招，監管風暴沒完沒了，繼滴滴出行於美國上市後，旗下叫車app慘遭下架後，國家又話要嚴審中資VIE境外上市，搞到外資驚咗，中資又要買佢怕，咁嘅氛圍下，投資氣氛點會好，港股七連跌後未止瀉，陰氣極重，今早恒指再挫逾500點。恒指低開79點，開市無耐跌幅曾縮至39點，見27921點半日高位，以為有啲曙光，誰知跟住沽壓顯著增加，最多跌588點，見27372點，創1月5日以來新低。恒指中午收報27401點，跌559點；國企指數報9908點，跌241點；恒科指低見7370點，創去年10月7日以來新低。半日重挫225點，報7377點。留意跌市成交放量，半日已過千億，但又唔多識彈，反映目前沽壓仍然嚴重。
藍籌股乏善可陳，只有龍湖(00960)跟煤氣(00003)半日逆市上升，其他藍籌普遍腳軟，瑞聲(02018)跌逾半成，油價下滑，中海油(00857)亦跌半成。海底撈(06862)落完地獄後曾逆市反彈，可惜今日再陪跌，半日同樣跌半成。咁多藍籌股半日跌逾5%都無乜幾可，可見大市形勢有幾惡劣。
科網股受監管風暴困擾，沽壓沉重，阿Man話咗ATM呢期無運行，但彈都唔彈樣衰成咁，真係有啲始料不及，騰訊(00700)失守535支持，下個大位500，阿里(09988)穿220，200呢個位岌岌可危，再失下個大支持位要落到180，美團(03690)跌穿250日後，再失270關，再下個支持位要去到250；至於小米(01810)算無咁傷，但失守26支持後，25不容有失。基本上平台股呢期未跌定，仍有機會向下尋底，阿Man已多番提醒，暫時不宜沾手，想撈底博反彈未係時候。
雖然海運價格高位，而航運股又輪住發盈喜，但今日亦不敵大市跌勢，至強龍頭中遠海控(01919)跟東方海外(00316)，下半分別跌近半成及一成。至於汽車股算係咁，吉利(00175)半日升4%，藍籌之中表現最好；比亞迪(01211)亦錄得1.6%升幅。不過回流港股上市新丁小鵬汽車(09868)半日跌7.5%，明顯市場怕咗中概股。
港股踏入7月以嚟跌逾千點，其中受政策影響中資股跌勢較為顯著，睇嚟阿爺出招無跡可尋，又快又狠，已嚇怕投資者，外資趕住減磅，北水短炒掟貨更為無情，暫時望大市守位27000呢個大關，一旦失埋呢一根最後稻早，阿Man都真係無眼睇落去。
麥狄文
(徐狄怡‧證監會持牌人)
