熱門:

2021年6月15日 即巿股評 港股直擊

【盤房來料】炒虛幣概念股不如直接炒虛幣

美股喺聯儲局議息前個別發展,標指跟納指再創收市新高,道指早段走弱,但尾市跌幅收窄,美股相對都幾堅挺。至於今早港股跟A股表現麻麻,市場憂慮核洩漏事件會否有影響,雖然中廣核而否認核電廠有問題,但股市淡友則借題發揮。恒指高開104點,開市價28946點已經係全日高位,一開市即掉頭向下,倒跌即失守20日(28834)及50日線(28737),半日最多跌388點,見28453點半日低位,亦為三個星期以嚟低位,其後跌幅收窄。恒指中午報收28622點,跌219點;國指跌93點,報收10667點;恒科指則跌50點,報收7940點。半日成交額857億,反映沽壓相對上周增加。

藍籌股普遍腳軟,金融類股份全線向下,留意友邦(01299)半日跌1.6%,失守95元支持位,呢個位守咗好多次,今日收市前若未能重返95元,有機會進一步下試91至92元尋找支持;其他金融股跌幅由0.5%至超過1%不等。

ATMX走勢五五波,騰訊(00700)跟阿里(09988)逆市升0.5%及0.6%,美團(03690)則跌近2%,小米(01810)雖然同比亞迪(01211)傾下一齊做車,但股價此起彼落,比亞迪半日升4.8%,小米則跌4%。不過小米28元樓下值得博,ATMX之中,阿Man認為博反彈小米最穩陣。

Elon Musk又出口術,之前明明話買Tesla唔收比特幣,依家又轉口風,佢金口一開,比特幣重上四萬美元大關,相關概念股又落鑊。不過都係嗰句,炒呢類股份除咗要心臟強大之外,反正都係高風險,倒不如直接炒幣更為直接。
話就話通脹升溫,但華爾街有專家話通脹升溫去買幣,黃金傳統抗通脹嘅王者地位被動搖,紐約期金跌至四星期低位,拖累金礦股受壓,相關金礦股閒閒地跌3%或以上。同炒虛幣概念股一樣,純因為睇住金價炒呢堆股份,倒不如直撞炒paper gold。

湖北省十堰市6月13日發生的燃氣爆炸已造成25人死亡,逾百人受傷。國務院安委會決定對事故查處進行掛牌督辦,國務院安委辦、應急管理部召開視頻會議,指要汲取教訓,落實安全生產責任,排查安全隱患,嚴防特大事故。今次嘅爆炸對內地城市燃氣分銷商,定必帶嚟負面影響,事件帶出了城市燃氣營運的安全風險,而中國燃氣(00384)料會特別受影響,因集團的合資公司於爆炸當地經營。涉事主角中燃今早開市期間停牌,股價停牌前跌14.5%,口痕友話咁都係好事,至少停咗牌股價可以停止唔再跌。家下唯有等待公司點解畫,希望可以挽回投資者信心。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads