熱門:

2021年4月14日 即巿股評 港股直擊

【盤房來料】買比特幣概念股不如直接買比特幣

美股隔晚以納指表現最好,納指升1%跑贏,標指更再創收市新高,又係靠科技股跟高增長股推動。港股呢邊今日嘅科技股表現唔錯,帶動恒指重上10日 線(28641)及20日線(28662)。恒指高開299點,成功收復10及20日線,開市升幅一度收窄至187點,見28685點半日低位,其後升幅擴大,升482點,見28979點半日高位。恒指中午報收28850點,升352點;國指升146點,報10997點;恒科指半日升188點,報收8227點。

藍籌股今日表現最好係吉利(00175),半日彈5.5%,但都補唔返前日插水嘅跌幅。藥明生物(02269)升2.6%,高增長今日有返啲起色。至於傳統股當然要讓路,不過傳統股好似友邦(01299)只係跌咗0.3%,又唔算好嚴重;大笨象(00005)亦只係跌咗0.2%,無傷大雅,只係大笨象嚟到現水平已乏力奮進。

科技股今日跟隨美國科技股做好,美團(03690)已表示有關CCASS倉位掉動跟主要股東沽貨套現傳聞並不屬實,半日股價彈4.4%,值得留意係美團嘅兩個主要股東,包括騰訊(00700)跟紅杉資本一直無出過聲,當然佢哋要大手沽貨套現,會先同美團打個招呼,呢一刻唔沽貨,唔代表遲啲唔沽貨,美團出聲係可以消除短期疑慮,但目前美團最大風險,反而係阿爺唔知幾時會出招針對美團,相對阿里(09988)或者騰訊,美團財力差咁多條街,一旦被罰款,對其打擊相當嚴重。若然噚日有趁急跌撈貨,今日食糊不為過,至於長線投資嘅投資者,咪一味麻木咁坐,要留意阿爺風向有冇風吹草動。

其他科技股今日反彈,但阿Man可以幾肯定,呢批股份仍未走出反覆上落格局,要回復2月強勢,喺無北水支持下,呢啲日子一去不復返。根據內地基金介嘅消息,4月以嚟已經有7隻基金需要延長募集期,即係收唔夠籌無水到,甚至有兩隻基金宣布發行失敗,可見基金集資情況並唔理想,暫時股民對市場嘅熱情仍然冷卻,甚至冰封。而基金界朋友表示,呢一次基金發行市場態度冷淡,呢個趨勢或持續整個季度,即係第二度股市迎來資金增量嘅機會率甚底,喺缺水情況下,第二季港股,尤其係極度依賴北水嘅新經濟股及高增長股,只會有波幅,難有升幅。

比特幣升穿歷史高位6.3萬美元創新高,相關概念股跑出,火幣科技(01611)升6.7%;美圖(01357)升4.5%;柏能集團(01263)升13.2%;歐科雲鏈(01499)升6%。對於相關概念股,阿Man決定食花生,講真要買比特幣概念股,不如直接買比特幣,有分析指比特幣今年有望見10萬美元,只係買得比特幣,心臟無返咁上下強大就咪以身試法。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads