隔晚美股個別發展，喺債息高企嘅情況下，舊經濟股主導嘅道指創新高，以新經濟股嘅納指則再插2.4%。今早科技股開波都係死晒狗，加上A股早段插到一仆一碌，港股今早曾跌逾200點。其後傳出國家隊入場救市，A股跌幅大大收窄，港股則轉跌為止，更曾收復29000大關，可惜中午收市此關得而復失。
恒指今早高開124點，報28665，但A股下挫，喺科技股繼續低開下，大市掉頭向下，一度倒跌214點，低見28326，創1月29日後最低。突然有消息指國家隊入市，港股極速收復失地，更曾轉升506點，高見29047，其後升幅收窄，二萬九關得而復失。恒指半日報收28924，升384點；國企指數半日收造11082，升67點；恒科指收報8239，升157點或1.95%，盤中一度低見7706點，一來一回反彈條數都幾襟計。
重磅藍籌股中，友邦(01299)跟大笨象(00005)半日分別升2.4%及1.8%，跑贏其他內銀股，創科(00669)業績好得到唔少大行加持，半日升8.5%，係表現最好藍籌股。內銀股今日回吐，噚日一向跑贏嘅招行(03968)率先回落逾4%，可能已預示呢一輪內銀股升勢隨時結束，半日內銀股普遍下跌，但跌幅唔算嚴重，跌幅較大嘅郵儲行(01658)跟農行(01288)都只係回咗2%左右。
美債息稍為回落，個別科技股有見底回升之象，當中以龍頭騰訊(00700)最得阿Man歡心，雖然股價曾低見613元，但迅速反彈一度高見664元，目前於650元附近上落，若然整個板塊見底，要買必先買龍頭，如果未有貨嘅缸邊友，可考慮喺650元樓下分段入貨建倉，參考止蝕位穿600元打靶，上望當然係上返700+。至於JATMX幾隻龍頭，估值相對便宜嘅阿里(09988)，220元又係可以收集水平，跌穿200再觀望，暫時呢啲位買一有定防守性。至於美團(03690)係呢一輪殺估值嘅重災區股，暫時喺300水平未企穩下，宜再觀望。至於京東(09618)跟小米(01810)暫時未似見底，雖然兩股前景都理想，前者靠分拆業務消息炒作，但相關消息暫時無咗影；後者則被美國制裁所困擾，短線要睇22元能否穩守。
總括嚟講，暫時可能有個別科技股已有短期見底跡象，但大市仍未回穩，欲趁低吸納都要分注唔急買，入場前訂好止蝕，市況仍反覆，要好好控制注碼，嚴守止蝕，稍見唔對路手起刀落，斬得快，好世界。
麥狄文
(徐狄怡‧證監會持牌人)
