美股隔晚個別發展，市場一邊憧憬新一輪刺激方案好快出台，經濟可以盡快復甦，但另一邊又擔心經濟復甦，經濟數據理想將引發通脹問題，總之就係美股目前處於高位，總有一百個理由覺得隨時會出現調整，咁市場有擔心好正常，總好過進入瘋狂狀態，毫無警覺性。不過阿Man認為美股即使出現較大幅度調整，只要資金仍然充裕，為咗抵抗銀紙貶值，買入股票資產仍然係不二之選，調整過後升浪仍會持續。
恒指高開98點報31183點，再創超過32個月新高，但 A股高開低走，走勢偏拖累下，港股升勢不保，更一度倒跌480點，低見30604，中午前跌幅收窄。恒指半日報收30723，跌361點；國企指數跌123點，報12105；恒生科技指中午收10661，跌283點。北水今日回歸，半日成交增加至1729.51億，較上日顯著增加。
唔少人都預期今日北水回歸，可能會出現返高潮，尤其上星期北水提早收爐後，港股截至噚日已錄得七連升，唔少股份急升過後，今日北水回歸要趁高套利食糊，事實上今早唔少熱炒股高開低走，反映有資金喺31000水平出貨鎖定利潤。
唔少傳統大藍籌股今早受壓，明顯係呢幾日急升後有人沽套利，友邦(01299)跌勢較顯著超過4%，質低恒指128點；而表現最差嘅藍籌係九倉(01997)半日跌近5%，其他藍籌股普遍下跌，反而重磅嘅騰訊(00700)盤中曾創新高，半日微升0.4%。大笨象(00005)急升過後唔多回，可能大家都想等埋下星期業績，睇下大笨象可以派返幾多息。
二線科技股亦遭殃，雖然連登契媽有繼續增持眾安(06060)、移卡(09923)同平安好醫生(01833)，除咗好醫生高開低走，半日跌3.7%，其餘兩股沽壓較嚴重，半日跌一成左右。其實三隻契媽點中嘅中概股，阿Man暫時最睇好平醫，皆因契媽只係剛入場，唔似得移卡跟眾安已入場一段時間，而股價亦已較入場之初倍升，平醫不價只係較契媽入場起步位升咗兩三成，點計都係多啲水位。不妨趁回吐喺130元附近搵位上車，跌穿120打靶，上面梗係博上160-180元，咁樣計就有數圍。光伏股呢期中晒伏，成個板塊今日跌到九彩，估計至少要等下月阿爺開會，再有新消息，呢個板塊至會有起色。
雖然今日唔少股份都高開低走，但一眾熱炒股，尤其係北水愛股，落到咁上下都見支持，阿Man反而覺得今日咁嘅款似震倉，考驗嗰啲無持貨能力嘅炒家，同埋滿倉衍生工具嘅賭鬼，如果係現金倉，又有平貨喺手，真係唔使咁緊張，急升回吐使乜咁擔心，要記住休息只係為咗走更遠嘅路。
麥狄文
(徐狄怡‧證監會持牌人)
