隔晚美股止跌回升，不過侵侵「臨別秋波」，走之前都要加強對華資企業施壓，簽行政命令禁止美國企業與個人參與8款中國企業開發的軟件交易，不過唔知係咪市場有共識，侵侵喺白宮嘅日子僅餘十幾日，當拜登上場後，呢啲行政命令或會成廢紙，既然係咁無有怕，所以相關股份今日無乜影響。
恒指低開36點，開市冇耐倒升69點，見27719點，再創去年2月20日以來新高，不過之後見回吐，轉升為跌，最多曾跌260點，見27389點半日低。恒指中午收報27410點，跌239；國企指數報10754點，跌19點；恒科指跑贏，最高見8699點創推出後新高，半日升68點。
『廢股繼續廢，貴股繼續貴』，尋日內地電訊股反彈，阿Man已講好趁機會跳車逃生，冷不防隔晩財長向紐交所旇壓，家下又話再考慮將幾隻電訊股除牌，叫人無適從，一日呢啲不明朗因素揮之不去，呢幾隻弱勢股只會維持弱勢。而內銀股亦係咁上下，繼續呆呆滯滯，頽勢難改。至於尋日阿Man話有意吼位上車嘅友邦(01299)，半日跌咗3%，但離10日線94.25仲差啲啲，買貨唔使急。至於其他內銀同內險股都腳軟，早早講咗金融股難有運行，唔好話阿Man咁刻薄叫呢啲股做廢老股。
科網股JATMX今日輪到威咗一輪嘅小米(01810)抖氣，瑞銀又再唱淡小米，削其目標價至22元，不過阿Man冇有怕，一向外資畀小米嘅目標價就唔係高，陰謀論係呢班鬼子佬根本唔夠貨，成日吹淡風想買平貨。反而JATM做好，京東(09618)得到連登契媽美國女股神增持京東美股，又有大行唱好其上季收入急升三成，裂口高開半日升6.4%。侵侵就算再簽行政命令，對呢啲股都無影響，之前阿Man推介嘅金山軟件(03888)更創新高，公司表示旗下金山辦公有關美國禁令對其無影響。
住建部等十部門昨日發表《關於加強和改進住宅物業管理工作的通知》，要求加快發展物業服務業，推動物業服務向高品質和多樣化升級。全個板塊皆落鑊，閒閒地升一成以上。物管股靜咗咁耐，難得依家十個部委一齊撐，肯定呢個板塊唔止炒一日半日咁快完事，只要大家回帶睇睇之前光伏股點炒法，套用去物管股度，今日只係個開始，睇嚟呢個板塊仲有至少一個星期可以玩。花多眼亂要點揀，阿Man原則炒大唔炒細，識揀一定揀龍頭，而二三線嘅股由於高位跌落嚟累積唔少蟹貨，寧願博破頂股都唔揀低位反彈股。
麥狄文
(徐狄怡‧證監會持牌人)
