侵侵話唔簽紓困法案都係扭吓計，轉過頭就正式簽署法案，加碼向每名國民直接派發2000美元現金。侵侵大筆一揮，又帶動美股三大指數齊創新高，港股今日亦跟住上，喺幾隻重磅科網股反彈下，港股重上10日及20日線。
恒指高開175點，報26490，其後升幅收窄至118點，見26432點半日低位後重拾動力，半日最多升282點，見26596點半日高位。恒指中午報26590，升275點，成功收復10日(26390)及20日線(26459)。國指半日升149點，報10460點；恒指科噚日急挫4.3%後，今日彈返3.3%，升255點，重上8000大關，中午報收8051點。
重磅科技股今日顯著反彈，阿里巴巴(09988)六連插後今日卒之反彈，有網民指知名連登仔麵麵之前唱好ATM三巨頭，三股即跌到反晒艇，噚日麵麵喺連登留言，指阿里要跌跌跌，今日阿里即彈，難怪麵麵已成為連登巴絲登嘅股壇燈神。連同美團(03690)、騰訊(00700)跟小米(01810)，ATMX齊齊推高大市，令恒指終能重返10日及20日線之上。至於其他重磅科網股京東孖寶，京東健康(06618)彈5.1%，京東集團(09618)則彈1.7%，京東集團彈得唔多，係相當呢期京東集團跌幅相對ATM較為溫和。至於小米發布新旗艦手機，股價隔晚喺ADR已上定先，今日一度重返33元水平，半日收市收32.6元，彈返4.6%，小米呢期跑贏JATM，阿Man自第三季開始，ATMX一直最睇好小米，事實上下半年幾隻科網巨頭之中，確係小米表現最好。
除咗一線科網股反彈，帶領恒科技半日升逾3%，其他科技股亦有唔錯表現，阿Man兩個幾星期前再度推介嘅金蝶國際(00268)半日創新高，跟微盟(02013)齊齊升近5%。相對金蝶再創新高，金山軟件(03888)表現落後，尤其係同樣屬雷家軍嘅金山軟件，中期業績公布後光死，由接近48元高位回落，但經過接近兩個月喺38至43元水平收集，係時候追追落要突破，不妨望多兩眼，只要成交配合，重上44元就有機挑戰前高位。
汽車股今日回吐，無論係汽車生產商抑或4S汽車股，今日都要抖氣唔多精神，吉利汽車(00175)創逾兩年半高後，吐3.3%；不過阿Man仍然睇好吉利前景，只係吉利25至28元有個晒士唔細嘅蟹貨區，都需要啲時間去消化，尤其呢期未見北水積極掃貨，睇嚟吉利都要再坐一會。其他汽車股阿Man就無乜點參與，曾經多次推介嘅比亞迪(01211)，股價一度高見198.5元新高後調頭，計返年初喺不足50元起步，今年累計升幅都幾個開，相信新能源汽車概念已過度反映，未來一段時間可能只會有波幅，冇升幅，要再創新高，睇怕公司要有新產品研發，或者交出超級亮麗嘅銷售數字，先可以吸引資金再入場。
麥狄文
(徐狄怡‧證監會持牌人)
