歐美疫情嚴峻，雖然疫苗已推出並開始為民眾接種，但市場將焦點放番去中美關係方面，美國商務部上周五再將77家企業列入實體清單，其中包括60家中國公司，中芯國際(00981) 及全球最大無人機生產商DJI大疆創新亦榜上有名。中芯發通告承認公司無前途，事件對公司10納米及以下先進工藝的研發及產能建設「有重大不利影響」，但稱「短期內營運及財務狀況無重大不利影響」，股價半日跌2.8%，市場反應算溫和，可能中芯一直被美國打壓，市場早已接受事實。
除咗中美關係之外，市場亦擔心科網龍頭股面對反壟斷壓力，令今早恒指一度跌逾200點，好彩A股半日低開高走，帶動港股收窄跌幅。恒指低開75點，又穿10日線(26441點)，開市後跌幅擴大，最多跌223點，見26274點半日低位。其後喺A股回升後喘穩，跌幅收窄至22點，見26476點半日高位。恒指中午收報26444點，跌54點；國企指數報10472點，跌10點；恒科指半日升7點，報8261。
以前就話「聖誕鐘、買滙豐」，不過呢枝歌仔已無得唱好多年，今年繼續唱唔響，今日大笨象(00005)仲要半日跌4%，係跌幅最大藍籌股，拖低大市。話咗大笨象股價要重上45元超高難度，家陣穿埋40元，阿Man都無眼睇。相反阿Man一向睇好嘅兩隻藍籌港交所(00388)同藥明生物(02269)創新高，半日分別升2.4%及4.6%。內需股有資金流入，安踏(02020)跟蒙牛(02319)半日逆市上升。
光伏玻璃短缺問題至明年亦未能解決，光伏玻璃價格持續高企，資金就繼續流入新能源股，上周阿Man講過信義光能(00968)配股後唔死得，肯定有後着，果然連續兩日再創新高，半日升一成，同系信義能源(03868)亦升9%。其他新能源股全線上升，當中最特出係新特能源(01799)升14.9%，其他新能源股閒閒地升2%以上。
科技股幾隻龍頭都腳軟，螞蟻集團率先下架旗下線上存款產品後，阿里(09988)半日跌1.2%；京東(09618)半日亦腳軟，騰訊(00700)半日跌0.9%。不過京東健康(09618)今日收市後將納入國指及科指，股價再創新高，半日升4.8%。美團(03690)跟小米(01810)逆市上升，小米更破頂創新高，升越30元。阿Man一直對小米充滿信心，兩年之內萬億市值不是夢。
物管股今日逆市造好，沉寂咗一排嘅物管股今日終於有番啲生氣，半新股華潤萬象生活(01209)和融創服務(01516)創新高，半日分別升8.6%和6.2%；不過之前碧桂園服務(06098)批股，阿Man對炒高嘅物管股有戒心，留意今年尚未配股集資嘅物管股，唔知會唔會有樣學樣，總之炒作物管股都要小心，提高警覺。
麥狄文
(徐狄怡‧證監會持牌人)
