人哋美股上星期五壞消息當好消息炒，即使就業數據不如預期，美股三大指數仍然能齊創收市新高，市場憧憬喺就業數據未如理想之下，將會加快推出新一輪刺激方案。加上疫苗推出進度理想，今個月內英美兩國將開始為民眾接種疫苗，市場憧憬使用疫苗後，有助加速經濟復甦，美匯指數跟金價疲弱，完全反映市場風險胃納上升。
至於港股又跟唔到，皆因富時羅素就美國點名跟中國軍方有關嘅國企剔出指數，市場擔心其他指數如MSCI或有樣學樣，加上有消息傳出美國有意制裁12名涉及DQ香港議員嘅內地官員，市場擔心中美關係惡化，港股自然被開刀。
恒指高開34點，開市報26870點已經係半日高位，開市後即倒跌，其後跌幅持續擴大，跌穿10日線(約26626點)和20日線(約26487點)，暫時最多跌579點，見26256點為三個星期低位。恒指中午收報26382點，跌453點；國指跌176點，半日報收10437點；恒科指跌47點,，中午報收7905點。
重磅藍籌股全面向下，友邦(01299)跌2.5%；大笨象(00005)亦跌1.7%，其他重磅股無一倖免。美團(03690)剛成為藍籌新貴，半日跌2.1%，ATMX全部跌，阿里(09988)、騰訊(00700)跟小米(01810)分別跌2.8%、1.1%及1.4%。
內房股今日繼續跑輸，人民幣雖然持續走強，但喺政策影響下，唔少房企公布上月銷售均見影響。當中曾經係阿Man嘅內房愛股嘅世茂(00813)被中金狠劈目標價31%，仲要剔出埋「確信買入」名單，股價今日再跌3%。而其他內房股閒閒地跌2%或以上。物管股光環消失，半新股恒大物業(06666)創新低，半日跌6.4%，其他唔少物管股亦齊創上市新低。內房股死死吓，相反本地地產股逆市升，此起彼落，升得有啲奇怪，明明疫情呢幾日嚴重咗，確診數字未見回落，地產股升都當睇佢唔倒。
恒生指數新一季度調整今日開始生效，三隻被納入恒綜指嘅成份股新貴包括明源雲(00909)、祖龍娛樂(09990)及渤海銀行(09668)今日起被納入港股通，可供深滬兩地北水買賣，三股表現有異，明源雲表現最好，半日升近一成。祖龍早段反彈見個半月高位，但22元企唔穩，半日跌1.2%；至於內銀渤海銀行半日跌一成，話咗內銀股唔多掂，避之則吉。
仲有兩個星期就放聖誕節長假，基金經理開始放假，而今年第一季因疫情急挫嘅各地股市經歷第二三季累積巨大升幅，尤其新經濟股炒到出煙，基金經理今年賺到盤滿砵滿，提早收爐都好合理。預期本月大市仍然會喺26000至27000之間上落，要向上突破二萬七未有條件，但向下大跌亦無藉口，市況將轉趨淡靜，建議減持股票增持現金，呢段時間倒不如早啲收拾心情等放假，少做少錯。
麥狄文
(徐狄怡‧證監會持牌人)
