美股隔晚感恩節假期休市，歐洲股市偏軟，港股就無乜方向，噚日創咗九個月新高後，今早回吐。恒指低開60點，開市後跌幅曾收窄至17點，見26801點半日高位，之後反覆偏軟，一倒跌114點，見26704點半日低位。恒指中午收報26776點，跌42點；國企指數報10716點，升14點；恒生科技指數半日升36點，報8093。
藍籌方面，以中資金融股表現最突出，尤其內銀股表現強勁，工行(01398) 升2.4%；建行(00939)升1%；郵儲行(01658)升1.6%；交行(03328)升1.9%。而內險股亦有資金追捧，平保(02318)創九個月高位，半日升0.2%；太平(00966)升3.1%。不過阿Man都係嗰句，呢啲股高追好易中伏，有貨反而要諗諗使唔使把握機會逃生。除咗金融股，地產股亦見有資金流入，不過阿Man同樣不為所動，睇下今日「三桶油」閒閒地跌2%，就會明白點解呢啲傳統股，唔好高追。
大型科網股個別發展，小米集團(01810)半日跌2%，半日報收26.05元，雖然印度收緊中國進口科技及通訊產品清關手續，對小米及oppo等內地手機品牌有影響，但今日股價反應唔算太大。其實小米除咗印度市場，內地及其他海外市場份額正上升，印度喺清關方面諸多挑剔，或會阻延小米於印度銷情，但對實際影響未必太大。作為長線投資，小米股價回軟，反而係收集好機會。阿里巴巴(09988)無起跌，騰訊(00700)跟美團(03690)分別升0.1%及1.1%。京東(09618)則跌0.2%。
阿Man對大市中長線走勢仍樂觀，而美元滙價喺QE政策下持續疲弱，人民幣轉強對中資股估值有利，而恒指亦企穩喺250日線之上多日，技術走勢好轉，如能突破27000水平企穩，有望展開中期升浪。目前資金於新舊經濟股之間穿梭，傳統股雖未能大升，但亦已靠穩，只要市場資金仍然充裕，喺流動性理想情況下，大市可望更上一層樓。
麥狄文
(徐狄怡‧證監會持牌人)
